काठमाडौं । आफूमाथि आइलागेको तत्कालको गर्जो टारेका प्रधानमन्त्री केपी शर्मा ओली सरकारको असफलताको ढोकछोप गर्न र पार्टीभित्रको असन्तुष्टि साम्य बनाउन सरकारको पूरै सेट परिवर्तन गर्ने तयारीमा छन् ।
प्रधानमन्त्री केपी शर्मा ओली मन्त्रिमण्डलमा पुरै सेट परिवर्तनको तयारीमा लाग्न आफ्ना विश्वासपात्रहरुलाई निर्देशन दिइसकेको बताइएको छ । उनले विश्वासपात्रहरुसँगको छलफलमा मन्त्रिमण्डलमा सबै नयाँ अनुहार ल्याउने बताएका छन् । ओलीले अब आफू पुरै नयाँ ढंगले अगाडि बढ्ने भन्दै मन्त्रिमण्डलमा हेरफेर नभई सेट नै परिवर्तन गर्नेबारे परामर्श गरेका थिए । सरकारको आलोचना र असफलतासँग सस्लाहकार टिम र सचिवालय पनि जोडिएका बेला उनले सल्लाहकार टोली
समेत परिवर्तनको संकेत गरेका छन् । सरकारमा रहेका मन्त्रीहरु विवादमा परेपछि ओलीले पुरै सेट परिवर्तनको तयारी थालेका हुन् । उनले यसपटक नेपाल कम्युनिस्ट पार्टीका अर्का अध्यक्ष पुष्पकमल दाहाल प्रचण्ड, वरिष्ठ नेताद्वय माधवकुमार नेपाल र झलनाथ खनाल र उपाध्यक्ष बामदेव गौतमलाई समेत चित्त बुझ्ने गरी मन्त्रिमण्डलमा नयाँ मन्त्रीहरु ल्याउन छलफल बढाइसकेका छन् । यसपटक उपप्रधानमन्त्री समेत रहेका रक्षामन्त्री इश्वर पोखरेल विवादमा परेकाले मन्त्रिमण्डल पुर्नगठनमा नपर्ने बताइएको छ । यसैगरी परराष्ट्रमन्त्री प्रदीप ज्ञवाली समेत नदोहोरिने भएका छन् । गृहमन्त्री रामबहादुर थापा बादललाई पनि निरन्तरता नदिने ओलीको तयारी रहेको बताइएको छ । सांसदमा मनोनित नभएपछि अर्थमन्त्री डा. युवराज खतिवडा पनि दोहोरिने छैनन् । एक दुईजना मन्त्रीहरु कार्यक्षमताका आधारमा दोहोरिने सम्भावना रहेपनि पुरै सेट परिवर्तन हुनसक्ने भएकाले नपर्न सक्छन् । अध्यक्ष प्रचण्डले पनि पुरै सेट परिवर्तनमा जोड दिएको बुझिएको छ । वरिष्ठ नेताद्वय माधव नेपाल र झलनाथ खनालको चाहना पनि त्यही देखिन्छ । यसपटक पार्टी उपाध्यक्ष बामदेव उपप्रधानमन्त्रीसहित महत्वपूर्ण मन्त्रालयमा लैजाने तयारी छ भने पार्टी प्रवक्ता नारायणकाजी श्रेष्ठ पनि उपप्रधानमन्त्रीसहित र शक्तिशाली मन्त्रालय दिने तयारी भइरहेको छ ।