काठमाडौं । सुदूरपश्चिम प्रदेशभरि कार्यरत स्वास्थ्य स्वयम्सेविकाले निःशुल्क स्वास्थ्य बीमाको सुविधा पाउने भएका छन् । प्रदेश सरकारले स्वास्थ्य स्वयंसेविकाको स्वास्थ्य बीमा खर्च व्यहोर्ने गरेको छ ।

स्वास्थ्य बीमा बोर्डले देशैभरका स्वास्थ्य स्वयंसेविकालाई ५० प्रतिशत छुटमा स्वास्थ्य बीमा सेवा दिँदै आएको थियो । सुदुरपश्चिम प्रदेश सरकारले बाँकी ५० प्रतिशत शुल्क पनि तिरिदिने निर्णय गरेको हो । हाल सुदूरपश्चिम प्रदेशमा मात्रै ६ हजारभन्दा बढी स्वयंम सेवकहरु कार्यरत छन् । गत वर्ष प्रदेश सरकारले प्रति महिला स्वास्थ्य स्वयंसेविका १० हजार रुपैयाँ दिएकोमा यस वर्ष बीमा शुल्क पनि निःशुल्क बनाएको हो ।

सुदूरपश्चिम प्रदेश सरकारका सामाजिक विकास मन्त्री कृष्णराज सुवेदीको उपस्थितिमा मन्त्रालयका उपसचिव झंकरबहादुर बिष्ट र स्वास्थ्य बीमा बोर्डका कार्यकारी निर्देशक रमेशकुमार पोखरेलले उक्त सम्झौतापत्रमा हस्ताक्षर गरेका हुन् ।