काठमाडौं । रोजगारीको खोजीमा रहेका र टुप्पी कसेर लोकसेवा आयोगको तयारी गरिरहेका युवाहरुलाई खुशीको खबर आएको छ । लोक सेवा आयोगले एक हजार भन्दा बढी अधिकृत पदका लागि आज सार्वजनिक विज्ञापन आह्वान गरेसँगै युवाहरुलाई खुशीको बहार आएको हो । प्रशासन, लेखा, राजश्व, परराष्ट्र, न्याय, संसदलगायत सेवाका लागि १ हजार ९६ पदमा आयोगले विज्ञापन खुल्ला गरेको हो । खुल्ला गरिएको विज्ञापनमा खुलाबाट ४ सय १९ र बढुवाबाट ३ सय २८ जनाको पदपूर्ति हुनेछ भने बाँकी ३ सय ४९ जना भने विभिन्न समावेशी समूहका लागि छुट्याइएको आयोगको सूचनामा उल्लेख गरिएको छ ।
सबैभन्दा बढी प्रशासन सेवाको सामान्य प्रशासन समूहमा ५ सय ६० जना अधिकृतका लागि विज्ञापन प्रकाशित भएको छ । त्यसमध्ये खुल्लाबाट २ सय १६ र बढुवाबाट १ सय ६८ जनाको पदपूर्ति गरिने छ । यस्तै उक्त समूहमा समावेशीतर्फ महिलामा ५८, आदिवासी जनजातीमा ४८, मधेसीमा ३९, दलितमा १५, अपाङ्गता भएकामा ९ र पिछडिएको क्षेत्रमा ७ जनाको कोटा छुट्याइएको छ भने राजश्व समूहमा ६९, लेखापरीक्षण समूहमा ४२, लेखा समूहमा ३० अधिकृतको माग भएको छ । यसैगरी व्यवस्थापिका संसद सेवातर्फ २८ र न्याय सेवा तर्फ न्याय समूहमा २ सय ९०, कानुन समूहमा ४९ र सरकारी वकिल समूहमा २४ अधिकृतका लागि विज्ञापन खुलेको हो । परराष्ट्र सेवामा भने जम्मा ४ जना अधिकृतको माग भएको छ ।
लोकसेवा आयोगबाट सार्वजनिक विज्ञापन यस प्रकार छ
