काठमाडौं । हिमालयन जनरल इन्स्योरेन्स कम्पनीले गत आर्थिक वर्षको मुनाफाबाट १०.५ प्रतिशत लाभांश प्रस्ताव गरेको छ। इन्स्योरेन्सको २४७ औं बैठकले हाल कायम चुक्ता पूँजीको ५ प्रतिशत बोनस र ५.५ प्रतिशत कर सहित गरी १०.५ प्रतिशत लाभांश प्रस्ताव गरेको थियो ।
प्रस्तावित उक्त लाभांश नियामक निकाय बीमा समितिको स्वीकृति पश्चात इन्स्योरेन्सको आगामी २६ औं वार्षिक साधारण सभाबाट पारित भएपछि शेयरधनीले पाउनेछन् ।
हाल एक अर्ब २ करोड ७२ लाख रुपैयाँ चुक्ता पूँजी रहेको इन्स्योरेन्सले ५ प्रतिशत अर्थात ५ करोड १३ लाख ६० हजार रुपैयाँ बराबरको बोनस वितरण गरेपछि चुक्ता पूँजी एक अर्ब ८ करोड रुपैयाँ पुग्नेछ।
कम्पनीले बीमा समितिले तोकेअनुसार जगेडा तथा कोषहरु कायम गर्नुपर्ने भएपछि गत आर्थिक वर्ष २०७४/७५ को मुनाफाबाट भने लाभांश वितरण गरेको थिएन। यसअघि आर्थिक वर्ष २०७३/७४ को मुनाफाबाट भने १५ प्रतिशत नगद लाभांश प्रस्ताव गरेको थियो।
