काठमाडौं । तीनवटा जीवन बीमा एकजुट भएर बनेको हिमालयन लाइफ इन्स्योरेन्सले गत आर्थिक वर्षमा नाफा बढाएको छ । साविकको प्राइम लाइफ, युनियन लाइफ र गुराँस लाइफ मर्जर पश्चात बनेको हिमालयन लाइफले गत आर्थिक वर्षको अन्यसम्ममा कम्पनीले १४ अर्ब ५७ करोड ६१ लाख रुपैयाँ खुद बीमाशुल्क आर्जन गरेको छ । यो अघिल्लो आर्थिक वर्षको यसै अवधिको तुलनामा ४.४६ प्रतिशतले कम हो । कम्पनीले अघिल्लो आर्थिक वर्षको यसै अवधिमा १५ अर्ब २५ करोड ७४ लाख रुपैयाँ बीमाशुल्क आर्जन गरेको थियो । कम्पनीको खुद नाफा भने ४२.५१ प्रतिशतले बढेर ५८ करोड १३ लाख रुपैयाँ पुगेको छ । अघिल्लो आर्थिक वर्षमा कम्पनीले ४० करोड ७९ लाख रुपैयाँ मात्रै खुद नाफा आर्जन गरेको थियो । यस्तै कम्पनीले लगानी कर्जा तथा अन्य आयबाट ४ अर्ब २३ करोड ६४ लाख रुपैयाँ र बीमालेख धितोमा ५ अर्ब ७१ करोड ७३ लाख रुपैयाँ लगानी गरी ४२ करोड २३ लाख रुपैयाँ आम्दानी गरेको छ । तीन कम्पनी मर्जर पश्चात कम्पनीको चुक्ता पूँजी ८ अर्ब २ करोड ३ लाख रुपैयाँ पुगेको छ । यस्तै कम्पनीको जगेडा कोषमा १ अर्ब ६ करोड ३५ लाख रुपैयाँ, जीवन बीमा कोषमा ५२ अर्ब १२ करोड ३१ लाख रुपैयाँ र महाविपत्ती कोषमा ४४ करोड ६५ लाख रुपैयाँ सञ्चित रहेको छ । यस अवधिमा कम्पनीले ५ लाख ७८ हजार ९५३ वटा बीमालेख जारी गरी कुल १४ अर्ब ९४ करोड ९९ लाख रुपैयाँ बीमाशुल्क आर्जन गरेको छ । यस्तै कम्पनीले १० हजार १२५ वटा दाबी वापत ५ अर्ब ४५ करोड २४ लाख रुपैयाँ भुक्तानी गरेको छ । यस अवधिमा कम्पनीको प्रतिशेयर आम्दानी ७ रुपैयाँ २५ पैसा, प्रतिशेयर नेटवर्थ ११८ रुपैयाँ ८३ पैसा र मूल्य आम्दानी अनुपात ६९.९५ गुणा रहेको छ ।
