काठमाडौं । भारतको केन्द्रीय बैंकले नेपाली र भारतीयलाई १०० भन्दा ठूला भारतीय नोट बोक्न सक्ने कानुनी व्यवस्था गरेको छ । भारतीय राजपत्रमा विदेशी विनिमय व्यवस्थापन विदेशी मुद्रा निर्यात तथा आयात नियमावली, २०१५ संशोधन गर्दै भारतीय रिजर्भ बैंकले यस्तो सुविधा दिएको हो । राजपत्रको यो सूचनासँगै अब भारतमा जाने नेपालीले २०० र ५०० दरका नोट पनि साथमा बोक्न पाउने कानुनी बाटो खुला भएको छ । यसअघि सन् २०१६ मा भारतमा डिमनिटाइजेसन भएपछि दुई देशबीच आवातजावत गर्दा १०० भन्दा ठूला दरका भारतीय नोट बोक्नु गैरकानुनी थियो । भारतले यो व्यवस्था गरेको भए पनि नेपालमा भने अहिले नै यो कानुनी भने भइसकेको छैन । नेपाल राष्ट्र बैंकका प्रवक्ता गुरु प्रसाद पौडेलले भारतले यो व्यवस्था संशोधन गरिसकेकाले नेपालमा पनि छिट्टै यसले कानुनी मान्यता पाउने बताएका छन् । दुई केन्द्रीय बैंकको एकीकृत प्रणालमा यसको आधिकारिक जानकारी आएपछि नेपालले पनि हाल विद्यमान रहेको नियमावली संशोधन गरेर राजपत्रमा प्रकाशित गर्नेछ । सोही राजपत्रको आधारमा राष्ट्र बैंकले बैंक तथा वित्तीय संस्थामा परिपत्र जारी गरेपछि औपचारिकता प्राप्त हुने पौडेलको भनाइ छ । कहिलेसम्म यो प्रक्रिया टुंगिन्छ र कहिलेदेखि ठूला नोटमाथिको प्रतिबन्ध फुकुवा हुन्छ ?भन्ने प्रश्नमा पौडेलले ठूला नोट प्रतिबन्ध फुकुवा नेपालले पनि माग गर्दै आएको विषय भएकाले अब छिट्टै नियमावली संशोधन सकेर औपचारिकता पूरा गरिने उनले बताए । रबीआईले विदेशी मुद्रा व्यवस्थापन मुद्रा निर्यात र आयात नियमावली, २०१५ लाई संशोधन गर्दै यो नयाँ व्यवस्था गरेको हो । यो सूचना प्रकाशित भएसँगै सन् २०१६ को नोटबन्दी पछि नेपालमा प्रतिबन्धित ठूला भारतीय नोटहरू दुईदेशको यात्राका क्रममा बोक्न कानुनी रूपमा नै पाइने भएको छ । भारतीय केन्द्रीय बैंक रिजर्भ बैंक अफ इन्डिया आरबीआईको सूचना अनुसार अब २५ हजार भारतीय रुपैयाँसम्मका ती नोट साथमा राख्न र बोक्न मिल्नेछ । यो सुविधा पाकिस्तान र बंगलादेशबाहेक देशका नागरिकलाई मात्र मिल्नेछ ।