टोकियो । जापानमा कोरोना भाईरसबाट संक्रमितहरुको संख्या ११ सय नाघेको छ । ३१ जना नयाँ कोरोना भाईरस संक्रमित फेला परेको यहाँको सार्वजनिक समाचार संस्था एनएचके टेलिभिजनले जनाएको छ । स्वास्थ्य मन्त्रालयका अधिकारीहरुलाई उदृत गर्दै टेलिभिजनको अनलाईन संस्करणमा प्रकाशित समाचार अनुसार १२ जना संक्रमितले हालसम्म ज्यान गुमाएका छन् । संक्रमितको संख्या ११ सय ७ पुग्दा डाईमण्ड प्रिन्सेस पानी जहाँजमा भेटिएका संक्रमितहरु ७ सय ११ जना रहेका छन् ।
त्यस बाहेक जापानमा हालसम्म ३ सय ९६ जनामा कोरोना भाईरसको संक्रमण भेटिएको छ । यसैगरि संक्रमित मध्ये ५९ जनाको स्वास्थ्यमा सुधार आएको र त्यसमध्ये केही कोरोना भाईरस संक्रमण मुक्त भईसकेका छन् । अर्को समाचार संस्था जापानटाईम्सले उपचाररत २४ जना बिरामीको अवस्था चिन्ताजनक रहेको समाचार प्रकाशन गरेको छ । कोरोना संक्रमित २४ जना गम्भिर अवस्थामा रहेको र उनिहरुको स्वास्थ्य थप चिन्ताजनक बन्दै गएको बताईएको छ ।
जापानले कोरोना भाईरसको संक्रमण फैलन नदिन विद्यालय बन्द सहित सभा, समारोह एवं ठूला खेल, सांगितिक कार्यक्रम रोक्न निर्देशन दिएको छ । चिन र दक्षिण कोरियाली नागरिकलाई दिएको लाखौं भिषा रद्द गर्दै ति देशबाट आउने नागरिकमाथि १४ दिन क्वारेन्टाईनमा रहनुपर्ने नियम बनाएको छ । कोरोना भाईरस व्यापक बनेको ईरान तथा ईटली लगायत देशबाट आउने यात्रुमा कडाई सहित नयाँ भिषा बन्द गरेको जापानमा देशभित्रै रहेका संक्रमितहरुबाट थप संक्रमण भईरहेको ठानिएको छ । यसको लागि जापान सरकारले कोरोना भाईरसको संक्रमणजन्य रुखाखोकी, ज्वरो, घाँटी दुख्ने तथा स्वास फेर्न गाह्रो हुने लगायत संकेत देखिएमा तत्काल स्वास्थ्य परिक्षण गराउन सबैमा अनुरोध गर्दै आएको छ । जापान सरकारले कोरोना भाईरस लागे नलागेको स्वास्थ्य परिक्षण सहित उपचार समेत निशुल्क हुने घोषणा गरिसकेको छ ।
