काठमाडौं । राष्ट्रिय निकुञ्ज तथा वन्यजन्तु संरक्षण विभागलाई अहिले कर्मचारी पदस्थापनाको चटारो लागेको छ । कर्मचारी समायोजन भएको र पदस्थापनाको काम बाँकी रहेको हुँदा गत असोजदेखिनै विभाग समायोजन भएर विभागमा आएका कर्मचारीहरुलाई पदस्थापना गर्न शुरु गरेको विभागका उपसचिव एवं कर्मचारी प्रशासन शाखाका प्रमुख अर्जुन गौतमले बताउनुभयो । विभागको कार्यक्षेत्रमा १२ सय कर्मचारीहरुको पदस्थापना गर्नुपर्ने रहेको छ । शाखा सहायक संरक्षण अधिकृत ५२ जना, रेञ्जर (सुब्बा) १२४ जना, सिनियर गेम स्काउट (खरिदार) २०२ जना, गेम स्काउट (श्रेणीविहनी) ७६५ र हात्तिसार समूहको ९४ जना गरी करिब १२ सय कर्मचारीको पदस्थापनाको अन्तिम तयारी भइरहेको गौतमले बताउनुभयो । यी कर्मचारीहरुलाई १२ वटा राष्ट्रिय निकुञ्ज, एउटा शिखर आकरक्षण, एउटा वन्यजन्तु आरक्षण र ६ वटा संरक्षित क्षेत्रमा पठाइने उहाँको भनाई थियो । विभागले कर्मचारीहरुलाई भरसक पायक पर्ने र रोजेकै स्थानमा पदस्थापना गरिने नीति रहेको छ ।