काठमाडौं । १९ जना बालिकाहरुको उजुरीपछि ललितपुरको एक प्राथमिक स्कुलका शिक्षक नन्दप्रसाद निरौला बिहीबार पक्राउ परेका छन्।
स्कुलका १९ जना बालिकाले आफूमाथि यौन दुर्व्यवहार भएको भन्दै लेखेको निवेदन र त्यसैका आधारमा प्रधानाध्यापक सविता सिलवालले दिएको उजुरीका आधारमा प्रहरीले निरौलालाई पक्राउ गरेको हो।
महालक्ष्मी नगरपालिका– ७, टीकाथलीस्थित श्रीनारायण आधारभूत विद्यालयका शिक्षक निरौलालाई अनुसन्धान निम्ति पाँच दिन म्याद थपिएको बताइएको छ ।
स्कुलका ३ देखि ५ कक्षाका बालिकाले यही फागुन २ गते शुक्रबार निरौलाद्वारा यौन दुर्व्यवहार भएको भन्दै प्रधानाध्यापकलाई निवेदन बुझाएका थिए। शिक्षक निरौलामाथि ९ देखि १४ वर्षका बालिकाहरूलाई यौन दुर्व्यवहार गरेको आरोप छ। उनी त्यहाँ सामाजिक विषय पढाउँथे।
