काठमाडौं । व्यवसायिक इमान्दारिता भन्दा पनि व्यक्तिगत स्वार्थ हावी भएपछि कुनै पनि व्यवसाय सफल हुन सक्दैन । अभिकर्ताकै आचारमा चल्ने जीवन बीमा व्यवसायमा सबैभन्दा ठूलो समस्या भनेको पोलिसी सरेन्डर नै बनेको छ । पछिल्लो समय आफ्नो ल्याकत भन्दा बढीको बीमा गराउने र त्यसलाई निरन्तरता दिन नसक्ने बीमीतको संख्या बढ्दै गएको छ । यो अवस्था आउनुमा सबैभन्दा ठूलो
जिम्मेवारी अभिकर्ताले लिनुपर्ने हुन्छ । चालु आर्थिक वर्ष २०८२–८३ को पहिलो दुई महिना साउन र भदौमा मात्सरै १५ हजार ८९८ बीमितले २ अर्ब ५० करोड ७ लाख रुपैयाँ पोलिसी सरेण्डर अर्थात बीमालेख समर्पण गरेका छन् । चालु आवको २ महिनामा भएको पोलिसी सरेण्डर रकम गत आवको सोही अवधिको तुलनामा ९.१८ प्रतिशतले र पोलिसी सरेण्डर संख्या १९.४७ प्रतिशतले घटेको छ । प्राधिकरणले प्रकाशन गरेको बीमा प्रतिबिम्मअनुसार गत आवको यही अवधिमा १९ हजार ७४१ बीमितले २ अर्ब ७५ करोड ३३ लाख रुपैयाँ बराबरको पोलिसी सरेण्डर गरेका थिए । दुई महिनाको अवधिमा तोकिएको समयमा पोलिसी नवीकरण र किस्ता नतिर्ने बीमितको संख्यामा वृद्धि भएको छ । प्राधिकरणको तथ्यांकअनुसार चालु आवको २ महिनामा १२ लाख १३ हजार ५६२ बीमालेख व्यतित भएका छन् । उक्त संख्याको बीमालेख व्यतित हुँदा ३६ अर्ब ४३ करोड ४७ लाख रुपैयाँ बीमा कम्पनीलाई घाटा भएको छ । गत आवको यही अवधिमा ११ लाख ८० हजार ६१६ बीमालेख व्यतित भएका थिए । व्यतित बीमालेख रकम ३४ अर्ब ६७ करोड ६९ लाख रुपैयाँ थियो ।