काठमाण्डौ । हतारमा जीवन बीमा गर्ने तर त्यसलाई निरन्तरता नदिने समस्या जीवन बीमाको सबैभन्दा ठूलो रोग बनेको छ । बीमा कम्पनीहरुमा नविकरण नभएका बीमा पोलिसीको संख्या थपिदै गएको छ । नेपाल बीमा प्राधिकरणका अनुसार चालु आवको ४ महिनासम्ममा जीवन बीमा कम्पनीहरुमा नविकरण नभएका बीमा पोलिसी संख्या १२ लाख १७ हजार ७०२ पुगेका छन् । जुन यो गत आवको सोही अवधिसम्मको तुलनामा ०.९७ प्रतिशत बढी हो । गत आवको चार महिनासम्ममा नविकरण नभएका पोलिसी संखया १२ लाख ५ हजार ९६२ रहेको थियो । प्राधिकरणका अनुसार कात्तिक मसान्तसम्ममा कुल ३६ अर्ब ७७ करोड ८५ लाख रुपैयाँ बराबरको बीमा पोलिसी नविकरण भएका छैनन् । यो रकम गत आवको सोही अवधिसम्मको तुलनामा ४।६९ प्रतिशत बढी हो । गत आवको कात्तिक मसान्तसम्म यस्तो रकम ३५ अर्ब १३ करोड २ लाख रुपैयाँ थियो । बीमा कम्पनीहरुमा पोलिसी समयमै नविकरण नहुदा पोलिसी नै ल्याप्स हुने र बीमाको सुरक्षा वा कभरेज नहुने जस्ता समस्या देखिन्छ । पछिल्लो समय बीमितहरुमा बीमा चेतनाको कमी हुनु र आर्थिक अवस्था राम्रो नहुनुले बीमा कम्पनीहरुमा पोलिसी रिन्यु नगर्ने परम्परा बढ्दै गएको छ । साथै केही हदसम्म बीमा अभिकर्ताहरुले कमिसनको प्रलोभलमा बीमितको आर्थिक अवस्था नबुझि ठूलो रकमको पोलिसी भिडाउने प्रवृत्तिले गर्दा पनि पोलिसी नविकरण नभएको देखिन्छ । साथै अभिकर्ताहरुले गराएको बीमाको पोलिसी बीमितहरुलाई अनुकूल नदेखिनु, बढी प्रिमियम र कम कभरेजको महसुस वा अन्य कम्पनी÷योजनामा आकर्षण देखिदा पनि पोलिसी नविकरण नहुने समस्या देखिदै गएको बीमा कम्पनीका सीइओहरु बताउँछन् । बीमा कम्पनीहरुमा नविकरण नभएको पोलिसी संख्या र रकम बढ्दै गएपनि सरेण्डर गर्नेको संख्या र रकम भने घट्दै गएको छ । प्राधिकरणका अनुसार सो अवधिसम्म कुल २९ हजार ४५९ वटा पोलिसी सरेण्डर भएका छन्, जुन यो गत आवको सोही अवधिसम्मको तुलनामा १८।१४ प्रतिशत कम हो । गत आवको सोही अवधिसम्म बीमा कम्पनीहरुमा ३५ हजार ९८५ वटा पोलिसी सरेण्डर भएका थिए । यता पोलिसी सरेण्डर रकम पनि गत आवको तुलनामा ६।२७ प्रतिशतले घटेको छ । कात्तिक मसान्तसम्म कुल ४ अर्ब ५२ करोड ६९ लाख रुपैयाँ बराबरको पोलिसी समर्पण भएको छ । गत आवको कात्तिक मसान्तसम्म भने ४ अर्ब ८२ करोड ९७ लाख रुपैयाँ बराबरको पोलिसी समर्पण भएका थिए । सरेण्डरदर घटेपनि बीमा कम्पनीहरुमा नविकरण नभएको पोलिसी संख्या र रकम भने बढ्दै गएको छ । यसले बीमा कम्पनीहरुको व्यवसायमा प्रभाव पार्ने देखिन्छ ।