काठमाडौं । सानिमा लाइफ इन्स्योरेन्स कम्पनीमा बीमा गरेका बीमितको असामयिक निधन भएपछि निजका आश्रित परिवारलाई कम्पनीले ९३ लाख ५२ हजार ५०० रुपैयाँ दावी भुक्तानी गरेको छ ।
काठमाडौं निवासी बीमित प्रकाश पुडासैनीको असामयिक निधन भएपछि हकवाला श्रीमती सुवार्ना थापालाई सो रकम बराबरको चेक कम्पनीका मुख्य प्रबन्धक गुणराज श्रेष्ठ र अण्डरराईटिङ प्रमुख सुस्मिता राणाले संयुक्त रुपमा सोमबार हस्तान्तरण गरेका हुन्।
सानिमा लाइफ इन्स्योरेन्स कम्पनीमा दुई वर्ष अघि काठमाडौंका कागेश्वरी मनोहरा निवासी पुडासैनीले विभिन्न तीन वटा बीमा पोलिसी खरिद गरेका थिए । कूल ९० लाख रुपैयाँको बीमा गराएकोमा बीमाङ्क रकममा बोनस रकम थप गरी दावी भुक्तानी गरेको हो ।
व्यवसायी पुडासैनीले दम्पत्ति बीमा, बालसुलभ बीमा तथा आफ्नो व्यक्तिगत जीवन बीमा गराएका थिए । व्यक्तिगत जीवन बीमाको दावी भुक्तानी गरिएको भएपनि १० लाख रुपैयाँ दम्पत्ति बीमा र बालसुलभ बीमा १० लाख रुपैयाँको बीमाङ्कको दावी भुक्तानी पोलिसी परिपक्व भएपछि भुक्तानी हुने बताइएको छ ।
दुई जना सन्तान तथा श्रीमती रहेका पुडासैनी परिवारले अभिभावक गुमाए पनि भविष्यका लागि जीवन जिउने आधार भने उनले छाडेर गएका छन् ।
