काठमाडौं । राजधानीमा कोरोना संक्रमित थपिनेक्रममा छन् । पछिल्लो २४ घण्टामा उपत्यकामा २३ सहित देशभर २५५ जनालाई कोरोना भाइरस रोगका संक्रमित थपिएका छन् । स्वास्थ्य तथा जनसंख्या मन्त्रालयका प्रवक्ता प्रा डा जागेश्वर गौतमले नियमित प्रेस ब्रिफिङमा यस्तो जानकारी दिनुभयो । उहाँका अनुसार काठमाडौंका १६ र ललितपुरका ७ सहित देशका २५ वटा प्रयोगशालामा गरिएको परीक्षणमा विभिन्न जिल्लामा गरि २५५ जनालाई कोरोना पुष्टि भएको जानकारी दिनुभयो । हालसम्म संक्रमितको संख्या १६ हजार ४२३ पुगेको छ । गौतमका अनुसार २५३ जना डिस्चार्ज भएका छन् । हालसम्म डिस्चार्ज हुनेको संख्या ७ हजार ७७५पुगेको छ । क्वारिन्टनमा २५ हजार ४० जना बसिरहेका छन् भने ८ हजार ६३६ जना संक्रमित आइसोलेसनमा रहेका छन् । पछिल्लो २४ घण्टामा ४ हजार ६९६ जनाको पीसीआर परीक्षण भएको छ । हाल धनकुटा, भोजपुर, हुम्ला, मुस्ताङ र सोलुखुम्बु जिल्लामा हाल एक जना कोरोना संक्रमित छैनन् । प्रदेश २ को महोत्तरी र रौतहट, प्रदेश ५ मा पाल्पा र सुदुपश्चिममा अछाम,कैलाली र बाजुरामा ५ सयभन्दा बढी एक्टिभ केस रहेको गौतमले जानकारी दिनुभयो ।