काठमाडौं । रोजगारीको खोजीमा रहेका र लोकसेवा आयोगको तयारीमा लागेका युवाहरुलाई राम्रो अवसर जुटेको छ । नेपाल राष्ट्र बैंकले सहायक निर्देशकसहित अन्य पदमा समेत गरी छ दर्जन बढी कर्मचारी माग गरेको छ । बैंकद्वारा प्रकाशित सूचनाअनुसार योग्यता पुगेका आवेदकहरुले यही कात्तिक २८ गतेसम्म आवेदन दिनसक्ने बैंकले जनाएको छ । त्यसैगरी दोब्बर दस्तुर तिरेर आगामी मंसिर ५ गतेसम्म अनलाईमार्फत आवेदन दिन सकिने बैंकद्वारा जारी सूचनामा उल्लेख गरिएको छ ।
बैंकले विज्ञापन आह्वान गर्दै प्रशासनतर्फ २८ जना सहायक निर्देशक (अधिकृत तृतीय) र लेखातर्फ सहायक निर्देशक (अधिकृत तृतीय), लेखा परिक्षणतर्फ ८ जना र सहायक (सहायक द्वितीय) मा ३१ जना गरी ६७ जना कर्मचारी माग गरेको हो । बैंकले सहायक निर्देशकका लागि २१ वर्ष पूरा भई ३५ वर्ष ननाघेका वाणिज्यशास्त्र, अर्थशास्त्र र व्यवस्थापन वा जनप्रशासनमा स्नातकोत्तर पास गरेको हुनुपर्ने योग्यता तोकेको छ । लेखा र लेखापरीक्षणका लागि सीए, एसीसीए वा सीपीए गरी मान्यताप्राप्त विश्वविद्यालयबाट स्नातकोत्तर गरेका २१ देखि ३५ वर्षसम्मका कर्मचारी माग गरिएको छ ।
सहायक द्वितीयका लागि १८ वर्ष पूरा भएका, ३५ वर्ष ननाघेका र १२ कक्षा उत्तिर्ण गरेको हुनुपर्नेछ । तर महिलाको हकमा भने ४० वर्षसम्मको उमेर हद तोकिएको छ ।
