काठमाडौं । कोरोना कहरका बीचमा पनि प्रिमियर इन्स्योरेन्सले नाफा मात्रै बढाएको छैन अन्य सूचकहरुमा समेत प्रगति गरेको छ । गत आर्थिक वर्षको चौथो त्रैमासको वित्तीय विवरण अनुसार कम्पनीले ४५.६९ प्रतिशत मुनाफा आर्जन गरेको छ । कम्पनीले ११ करोड भन्दा बढि मुनाफा बृद्धि गर्न सफल भएको हो ।
गत आवको अघिल्लो वर्ष २४ करोड ५६ लाख २३ हजार रुपैयाँ मुनाफा आर्जन गरेकोमा गत आवमा ३५ करोड ७८ लाख ७० हजार रुपैयाँ मुनाफा आर्जन गर्न सफल भएको हो । कम्पनीको दावी भुक्तानी घटेको कारण मुनाफा बढेको हो । कम्पनीले अघिल्लो वर्ष ४८ करोड ९० लाख ५२ हजार रुपैयाँ दावी भुक्तानी गरेकोमा गत आवमा ६ करोडले घटेर ४२ करोड ५९ लाख २५ हजार रुपैयाँमा सीमित भएको छ ।
त्यस्तै, कम्पनीको व्यवस्थापन खर्च खासै बढेको छैन भने अन्य प्रत्यक्ष आय ४ करोडले बृद्धि भएको छ । अघिल्लो वर्ष २५ करोड १२ लाख ९७ हजार व्यवस्थापन खर्च गरेको कम्पनीले गत आवमा २५ करोड ७३ लाख १३ हजार रुपैयाँ खर्च गरेको छ । कम्पनीको भुक्तानी हुन बाँकी दावी भुक्तानी दुई अर्ब ३१ करोड २२ लाख १३ हजार रुपैयाँ रहेको छ ।
अघिल्लो वर्ष एक अर्ब ९३ करोड ६१ लाख २७ हजार रुपैयाँ रहेको थियो । कम्पनीले बीमा कोष, जगेडा कोष र महाविपत्ति कोषमा गरी कूल एक अर्ब छ करोड तीन लाख ४७ हजार रुपैयाँ जम्मा गरेको छ । कम्पनीले कोषको आकारमा थप ५० प्रतिशतभन्दा बढि योगदान गर्न सफल भएको छ । अघिल्लो वर्ष जम्मा ६८ करोड ८२ लाख ६० हजार मात्रै थियो । गत आर्थिक वर्षको वित्तीय विवरणले प्रिमियर इन्स्योरेन्स कम्पनी थप बलियो भएको देखिएको छ ।
