काठमाडौं । नेपाल चियामा आत्मनिर्भर बन्दै गएको बेला गुणस्तरमा पनि सुधार आउन थालेको छ । गत बुधबार झापामा रहेका २७ वटा चिया कम्पनीबाट उत्पादित चियाको गुणस्तर परीक्षण गरिएको थियो । राष्ट्रिय चिया तथा कफी विकास बोर्ड क्षेत्रीय कार्यालय बिर्तामोडले आयोजना गरेको परीक्षणमा भद्रपुर–५ मा रहेको रिलायन्स टी इण्डष्ट्रिज उद्योग उत्कृष्ट भएको थियो ।
बोर्डले बुधबार दिउँसो भद्रपुरमा झापा र इलाममा सञ्चालित २४ ओटा सिटीसी र तीनओटा अर्थोडक्स तयारी चिया परीक्षण गरेको थियो । बोर्डका प्राविधिक र भारतीय चिया बोर्डका विज्ञ बुद्धदेव आचार्यले परीक्षण गरेकोमा सबैभन्दा बढी ५ दशमलव ५ प्रतिशत अङ्क रिलायन्सको उत्पादनमा देखिएकोले सो उद्योगलाई उत्कृष्टताको प्रमाण–पत्र र ५ हजार नगद सञ्चालक जेपी शर्मालाई प्रदान गरिएको थियो ।
बोर्डले बेलाबखत परीक्षण गरेमा उत्पादनको अवस्थाको बारेमा जानकारी पाउन सजिलो हुनुका साथै उत्पादन परिवर्तन गर्न सहज हुने स्टार टी भद्रपुरका उद्योगी शिवकुमार गुप्ताले जनाए । वार्षिक कार्यक्रममा राखेर गरिएको परीक्षणको कुनै तुक नभएको उद्योगी यामबहादुर श्रेष्ठले बताए । प्रत्येक महिनामा तयारी चियाको परीक्षण हुनुपर्ने उनको माग छ । चियालाई हेर्ने दृष्टिकोण नकारात्मक भएकोले सरकारलाई चिया उत्पादन उद्योगको आवश्यकता नरहेको समेत उनले बताए ।
