काठमाडौं । संघीय संरचनामा उद्योग प्रवद्र्धनसम्बन्धी कार्यक्रम उद्योग विभागको अग्रसरतामा प्रदेश नम्बर ५ को भैरहवामा सम्पन्न भएको छ । देश संघीय संरचनामा गइसकेपछि उद्योग प्रवद्र्धनको क्षेत्रमा कसरी अगाडि बढ्न सकिन्छ भन्ने दृष्टिकोणले एक दिने कार्यक्रम आयोजना गरिएको विभाग अन्तर्गतको घरेलु, साना, मझौला उद्योग प्रवद्र्धन शाखाका निर्देशक दिपक घिमिरेले बताउनुभयो । प्रदेशस्तरका सरोकारवाला निकायहरूको उपस्थितिमा आयोजित उक्त कार्यक्रमको प्रदेश नं. ५ का उद्योग, पर्यटन, वन तथा वातावरणमन्त्री लिला गिरीले उद्घाटन गर्नुभएको थियो ।
कार्यक्रममा बोल्दै मन्त्री गिरीले प्रदेशको विकासका लागि उद्योग प्रवद्र्धनको क्षेत्रमा महत्वपूर्ण भूमिका निर्वाह गर्नुपर्ने आवश्यकता रहेको औल्याउनुभएको थियो । निजी क्षेत्र, उद्यमी, सरोकारावाल निकालयको उपस्थिति रहेको उक्त कार्यक्रममा विभागका महानिर्देशक जिवन सिटौलाले उद्यमीहरूको पक्षमा विभागले महत्वपूर्ण भूमिका निर्वाह गर्दै आएको बताउनुभएको थियो भने कार्यक्रममा उद्योग बाणिज्य महासंघ प्रदेश नं. ५ का संयोजक गुणनिधि निवारीले प्रदेश र संघको समन्वय भए मात्रै उद्योग क्षेत्रको विस्तार हुने बताउनुभएको थियो ।
उक्त कार्यक्रममा उद्योग प्रवद्र्धनका क्षेत्रमा रहेका अप्ठ्याराहरू, ऐन नियमका पक्ष र बन्द अवस्थामा रहेको फर्म नविकरणको समस्या लगायतका विषयमा सरोकारावालाहरूले संघ र प्रदेश सरकारको ध्यानाकर्षण गराएका थिए । उक्त कार्यक्रममा विभागका निर्देशक प्रेम लुइटेलले उद्योग दर्ता प्रक्रिया र सुविधाका सम्बन्धमा, संघीय उद्योग बाणिज्य तथा आपूर्ति मन्त्रालयका उपसचिव (प्रा) प्रभातकुमार सिंहले घरेलु तथा साना उद्योगमा प्रविधि हस्तान्तरण र विज्ञ डा. रामजी न्यौपानेले लघु उद्यमको महत्वका बारेमा नेपाल सरकारले गरेका प्रयासहरूको बारेमा कार्यपत्र प्रस्तुत गर्नुभएको थियो । प्रस्तुत कार्यपत्रमाथि सहभागीहरूले महत्वपूर्ण सुझाव दिएका थिए । उक्त सुझावलाई समेटेर विभागले महत्वपूर्ण नीतिगत निर्णय लिने बताइएको छ ।
