काठमाडौं । यहाँ कुनै एउटा व्यापार सफल भयो भने सबैको ओइरो त्यतै लाग्छ । फरक सोच्ने भन्दा पनि उस्तै व्यापार गर्ने होडबाजी चल्ने गर्छ । नेपालमै पुनर्बिमाको आवश्यकता देखेर नेपाल पुनर्बीमा कम्पनीको स्थापना भयो । जसको आकर्षण बढेपछि अहिले थप पुनर्बिमा कम्पनीहरु पनि खुल्ने क्रममा छन् । अहिले व्यावसायिक घरानादेखि बीमा क्षेत्रमै आवद्ध रहेका व्यक्तिहरुले पुनर्बीमा कम्पनी खोल्न सक्रियता देखिएका छन् । दुई साता अघि बीमा समितिले नयाँ पुनर्बीमा कम्पनी आवश्यकता रहे–नरहेको बारे अध्ययन गर्न समिति नै गठन गरेको छ । तर बीमा क्षेत्रका विज्ञ, व्यावसायिक घराना साथै म्यानपावर व्यवसायी समेत यतिबेला नयाँ पुनर्बीमा कम्पनी खोल्न जोडबलका साथ लागिरहेका छन् । समितिको अध्ययन अघि नै कम्पनी खोल्ने हतारो शुरु भइसकेको छ । बीमा समितिले आवेदन भने खुलाएको छैन । बीमा समितिले रोके पनि यतिबेला चार वटा प्रस्ताविक कम्पनीहरु चर्चामा छन् । काठमाडौं रि इन्स्योरेन्स, जेन्यून रि इन्स्योरेन्स, अन्नपूर्ण रि इन्स्योरेन्स, प्रुडेन्सियल रि इन्स्योरेन्स नामक चार वटा कम्पनी प्रस्ताव गरेर छुट्टाछुट्टै समूहले लाइसेन्स लिन जोडबल गरिरहेका छन् ।
००००
अहिले नेपालमा एउटा पुनर्बीमा सञ्चालनमै छ । नेपाली बजार सानो भएका कारण र सबै जोखिम एकै ठाउँमा केन्द्रीत गर्दा देशको अर्थतन्त्र समेत धरासायी हुने भएका कारण धेरै पुनर्बीमा कम्पनीको आवश्यकता नरहेको विज्ञहरु बताउँछन् । बीमा समितिका कार्यकारी निर्देशक पौडेल अध्ययन समितिको प्रतिवेदनले जे सुझाव दिन्छ त्यसपछि मात्रै कतिलाई दिने कसरी दिने भन्ने विषयमा छलफल हुने बताएका छन् । बीमा समितिका नवनियुक्त अध्यक्ष सूर्यप्रसाद सिलवाल पनि धेरै कम्पनीहरुलाई सञ्चालन अनुमति नदिने पक्षमा रहेको बताइन्छ ।
प्रस्तावित पुनर्बीमा कम्पनीहरुमध्ये काठमाडौं रिमा बीमा क्षेत्रका विज्ञहरुको समूह छ । उक्त कम्पनीमा बीमा क्षेत्रको नियमनकारी निकाय बीमा समितिकै पूर्वअध्यक्ष देवेन्द्रप्रताप शाह, बीमा कम्पनीका सबै भन्दा पुराना सीईओ रमेशकुमार भट्टराई, नेपाल पुनर्बीमा कम्पनीका पूर्व अध्यक्ष महेश गुरागाईं र आईएमई लाइफ इन्स्योरेन्सका पूर्वप्रमुख कार्यकारी अधिकृत श्रीचन्द्र भट्टको सक्रियता देखिन्छ ।
प्रस्तावित अर्को जेन्यून रि इन्स्युरेन्समा दुई जना बीमा क्षेत्रका विज्ञहरु रहेका छन् । बीमा समितिकै कार्यकारी निर्देशकबाट अवकाश पाएका श्रीमान कार्की र पोखरा विश्वविद्यालयका प्राध्यापक डा. रवीन्द्र घिमिरे यो कम्पनीमा रहेका छन् । यस कम्पनीमा म्यानपावर व्यवसायी रघु पुरी समेत सहभागी रहेको बताइएको छ । यस कम्पनीले भने विदेशी साझेदार जुटाइसकेको छैन ।
काठमाडौं रि इन्स्योरेन्समा बीमा समिति तथा नेपाल पुनर्बीमा कम्पनीको नेतृत्व चलाइसकेका र बीमा कम्पनी चलाएका अनुभवी व्यक्तिहरुको दक्ष समूह छ । तुलनात्मक हिसाबले अन्य प्रस्तावित कम्पनीमा त्यस्तो देखिंदैन । पछिल्लो साता मात्रै काठमाडौं रि इन्स्योरेन्समा निजी क्षेत्रलाई छुट्याइएको ३ अर्बको लागि ४ अर्ब जति लिखित सहमति पत्र आइसकेको बताइएको छ । बैंक बीमाको लागि छुट्याइएको ४ अर्बमध्ये २ अर्ब जति प्रतिबद्धता आइसकेको र अन्यको पनि आउने क्रम जारी रहेको प्रस्तावित कम्पनीका सञ्चालकहरु बताउँछन् ।