काठमाडौं । राजश्व अनुसन्धन विभागले राजश्व चुहावट गरेको अभियोगमा संखुवासभा घर भएका तोप्के भोटेलाई ३० करोड बिगो कायम गरी संखुवासभा जिल्ला अदालत चैनपुरमा मुद्दा दर्ता गरेको छ । विभागद्वारा जारी विज्ञप्तिमा २५ केजि सुन भन्सार चोरी पैठारी गरी राजस्व चुहावट गरेको कसुरमा १५,१३,२५,००० तथा विदेशी बिनिमय अपचलनको अभियोगमा कसुर बरारको बिगो रकम थप गरी ३० करोड २६ लाख ५० हजार बिगो कायम गरी संखुवासभा जिल्ला अदालतमा मंसिर १० गते मुद्दा दायर गरिएको हो ।

जिल्ला प्रहरी कार्यालय संखुवासभाबाट खटिएको टोलिले चेकजाँचको क्रममा तोप्के भोटेको शरिर तथा निजले वोकेको झोलाबाट विना विल विजक लुकाई छिपाइ ल्याउँदै गरेको ५ के.जि. सुन बरामद गरी यस विभागमा जिल्ला प्रहरी कार्यालयबाट दाखिला भई अनुसन्धान गर्दा प्रतिवादी तोप्के भोटे, रिन्जीन भोटे, जर्गा भोटे, छिरिङ भोटे, ग्यात्सो भोटे, क्यमा भोटे र सोनाम डोमा भोटे समेतले आपसी मिलेमतो गरी सुन भन्सार चोरी पैठारी गरी राजस्व चुहावट गरी ल्याएको पाइएको बताइएको छ ।