काठमाडौं । प्रविधिको विकाससँगै अपराधको पनि सँगसँगै विकास भएको छ । नेपाली एटिएमबाट चिनियाँहरुले पैसा झिक्ने गरेको घटना अब नौलो रहेन । पर्यटकको भेषमा आएका चिनियाँहरुले यस्ता हर्कत पटक पटक गरिसकेका छन् ।
चिनियाँ ह्याकरहरुले नेपाली बैंकहरुको प्रणाली ह्याक गरी ग्राहकको गोप्य नम्बर प्रयोग गरेर एटिएमबाट फेरि ठूलो रकम निकालेका छन् । यसमा संलग्न पाँच चिनियाँ पक्राउ परेका छन् ।
नेपाल प्रहरीको महानगरीय प्रहरी परिसर काठमाडौँले मध्यरातमा दरबारमार्गस्थित नवील बैंकको एटिएमबाट अनाधिकृतरुपमा पैसा निकाल्दै गर्दा चिनिया नागरिकहरुलाई पक्राउ गरेको हो । उनीहरुलाई पक्राउ गरिएको जानकारी महानगरीय प्रहरी परिसर काठमाडौँका प्रमुख, प्रहरी वरिष्ठ उपरीक्षक उत्तमराज सुवेदीले गराए ।
शुरुमा एटिएमबाट पैसा निकाल्दै गर्दा एक जना पक्राउ परेकोमा उर्सैको बयानका आधामार थप चार जना दरबारमार्गमा रहेको माया मनोहर होटलबाट पक्राउ परेका हुन् ।
उनीहरुसँग प्रहरीले एक करोड २६ लाख नेपाली रुपैयाँ र नौ हजारभन्दा बढी अमेरिकन डलर बरामद गरेको छ । पक्राउ परेकासँग आवश्यक अनुसन्धान भइरहेको छ । प्रहरीले केहीबेरमा पत्रकार सम्मेलन गरेर पक्राउबारे जानकारी दिने बताएको छ ।
११ बाणिज्य बैंकको लगानी रहेको नेपाल इलेक्ट्रोनिक पेमेन्ट सिस्टम्स लिमिटेड (नेप्स) को भुक्तानी प्रणालीलाई समेत चिनियाँ गिरोहले ह्याक गरेको बताईएको छ । यसबाट कम्तिमा ६ वटा बैंकको प्रणालीमा क्षति पुगेको बताइन्छ ।