काठमाडौं । स्वास्थ्य मन्त्रालयले स्वास्थ्य राज्यमन्त्री हिराचन्द्र केसीको अध्यक्षतामा स्वास्थ्य बीमा समस्या समाधान कार्यदल बनाएको छ। बिहीबार स्वास्थ्य मन्त्रालयमा बसेको मन्त्री स्तरीय बैठकले स्वास्थ्य बीमा समस्या समाधान गर्न स्वास्थ्य राज्यमन्त्री केसीको अध्यक्षतामा ५ सदस्यीय कार्यदल गठन गरेको हो।
जसमा स्वास्थ्य मन्त्रालयका प्रमुख विशेषज्ञ डा गुणराज लोहनी, बीमा बोर्डका सदस्य डा सुरेश तिवारी, श्रम, रोजगार तथा सामाजिक सुरक्षा मन्त्रालयका सहसचिव र प्रमुख औषधि व्यवस्थापक नारायण ढकाल रहेका छन्। स्वास्थ्य बीमा कार्यक्रममा विभिन्न समस्या तथा चुनौतीहरु बढ्दै गएपछि सरकारले उच्च स्तरीय कार्यदल गठन गरेको जनाएको छ।
उक्त समितिले स्वास्थ्य बीमा कार्यक्रमको अवस्था र चुनौती अध्ययन, विश्लेषण एवं समिक्षा गरी स्वास्थ्य बीमा कार्यक्रममा विद्यामान समस्या समाधानका लागि तीन हप्ताभित्र पष्ठपोषणसहित प्रतिवेदन पेश गर्ने जनाइएको छ।