काठमाडौं । असोज महिनामा एक हजार ५०० रुपैयाँले बढेको सुन अझै उकालो लाग्ने अनुमान गरिएको छ । नेपाल सुनचाँदी व्यवसायी महासंघका अनुसार असोज १ गते, प्रतितोला ९१ हजार ८०० रुपैयाँमा खरिदबिक्री भएको सुन असोज ३१ गते सम्म आइपुग्दा प्रतितोला ९३ हजार ३०० रुपैयाँ पुगेको हो । यस महिनामा सुन सबैभन्दा उच्च मूल्यमा असोज २३ गते कारोबार भएको थियो । दशैं पछिको पहिलो कारोबार दिन, सुन प्रतितोला तीन हजार रुपैयाँले महंगिएको थियो । सो दिन, सुन प्रतितोला ९६ हजार रुपैयाँ पुगेको महासंघको तथ्यांकमा देखिन्छ । तर सबैभन्दा सस्तो भने सुन असोज ५ गते रहेको थियो । बुधबार सुन प्रतितोला ९१ हजार ३०० रुपैयाँमा झरेको थियो ।
सुनको मूल्य बढेपनि चाँदीको मूल्य भने असोज महिनामा भने सस्तिएको छ । यो महिनामा चाँदी तोलामा २५ रुपैयाँले घटेको छ । असोजको पहिलो दिन चाँदी प्रतितोला एक हजार १८५ रुपैयाँमा खरिदबिक्री भएको थियो । तर असोजको अन्तिम दिन भने चाँदीको मूल्य प्रतितोला एक हजार १६० रुपैयाँ तोकिएको छ । असोज २३ गते, चाँदी सबैभन्दा महंगो भएको थियो । त्यस दिन, चाँदी तोलामा नै ८५ रुपैयाँले बढेर प्रतितोला एक हजार २५५ रुपैयाँसम्म पुगेको थियो । दशैं बिदाका कारण एक साता पछि मूल्य तोकिँदा एकैदिन चाँदीको भाउ बढेको हो । यस महिनामा चाँदी प्रतितोला एक हजार १४५ रुपैयाँ कायम रहेर सर्वाधिक सस्तो भएको महासंघको तथ्यांकमा देखिन्छ ।
अमेरिका र रूसबीचको तनाव बढिरहेमा सुनको भाउ बढ्न सक्ने अनुमान सुनचाँदी व्यवसायीहरूको छ । अमेरिका र रूसको तनावका कारण दशैंको समयमा सुनचाँदीको भाउमा उल्लेख्य वृद्धि देखिएको नेपाल सुनचाँदी व्यवसायी महासंघको भनाई रहेको छ । विश्व बजारमा सुन एकैदिन प्रतिअउन्स १२ डलरले बढ्यो । उता विश्व बजारमा सुन एकैदिन प्रतिअउन्स १२ डलरले बढेको छ । २४ घणटामा सुन प्रतिअउन्स १२ डलरले महंगिएर एक हजार ६५५ डलर पुगेको छ । यद्धपी ३० दिनमा भने सुन प्रतिअउन्स ३१ डलरले गिरावट भएको छ।