काठमाडाैं । पूर्वसैनिक शासक जनरल परवेज मुशर्रफलाई पाकिस्तानी अदालतले दोषी ठहर गर्दै मृत्युदण्ड सुनाएको छ । पाकिस्तानको इतिहासमा पहिलोपटक पूर्वसेनापतिलाई देशद्रोहको मुद्दामा दोषी ठहराउँदै मृत्युदण्ड सुनाइएको हो । अदालतको उक्त निर्णयसँगै पाकिस्तानको सेनाले भने कडा आपत्ति जनाएको बताइएको छ । सेनाका प्रवक्ता मेजर जनरल आसिफ घफुरले एक विज्ञप्ति जारी गर्दै जनरल परवेज मुशर्रफको बिरूद्ध अदालतको फैसलाले सेनालाई स्तब्ध पारेको र यो अत्यन्त दुःखद निर्णय भएको बताएका छन् । मुशर्रफले ४० बर्षसम्म देशको सेवा गरेको बताउँदै देशको रक्षाका लागि लडेको व्यक्ति कहिल्यै पनि देशद्रोही हुन नसक्ने ठहर पनि पाकिस्तानी सेनाले गरेको छ । विशेष अदालतको तीन न्यायाधीश पीठले मृत्युदण्डको फैसला सुनाएको हो । मृत्युदण्डको सजायँ सुनाइएका मुशर्रफ हाल दुबईस्थित अस्पतालमा उपचार गराइरहेका छन् । अदालतको निर्णय आएलगत्तै मुसरर्फले एक भिडियो सन्देशमार्फत् भनेका छन्, अदालतको निर्णय बिल्कुल निराधार छ । हामीले १० बर्षसम्म देश र सेनाको नेतृत्व लियौं । म पाकिस्तानको लागि पनि लडेको थिएँ । यो निर्णयले हामीलाई यातना दिइएको महसुस भएको छ । (बीबीसी)
