काठमाडौं । रिलायवल नेपाल लाइफ इन्स्योरेन्सले गत आर्थिक वर्षको वित्तीय विवरण प्रकाशित गरेको छ । उक्त वित्तीय विवरण अनुसार कम्पनीको खुद बीमाशुल्क घटे पनि नाफा भने बढेको छ । भर्खरै प्रिमियम मूल्यमा आईपीओ निष्काशन गरेको रिलायबल नेपाल लाइफले गत आर्थिक वर्षको चौंथो त्रैमाससम्ममा कम्पनीको खुद बीमाशुल्क ७.७३ प्रतिशतले घटेर ३ अर्ब ४७ करोड ८९ लाख रुपैयाँमा सीमित भएको हो । अघिल्लो आर्थिक वर्षको यहि अवधिमा कम्पनीले ३ अर्ब ७७ करोड १ लाख रुपैयाँ खुद बीमाशुल्क आर्जन गरेको थियो । यस्तै कम्पनीको खुद नाफा भने ५७.२८ प्रतिशतले बढेर ४३ करोड २२ लाख रुपैयाँ पुगेको छ । कम्पनीले अघिल्लो आर्थिक वर्षको यसै अवधिमा २७ करोड ४८ लाख रुपैयाँ खुद नाफा आर्जन गरेको थियो । कम्पनीले लगानी कर्जा तथा अन्य आयबाट ७० करोड ४८ लाख रुपैयाँ, बीमालेख धितोमा ३० करोड ३१ लाख रुपैयाँ कर्जा प्रवाह गरी ९० लाख ६२ हजार रुपैयाँ आम्दानी गरेको छ । चुक्ता पूँजी २ अर्ब ८० करोड रुपैयाँ रहेको कम्पनीले १ अर्ब २० करोड रुपैयाँ बराबरको १ करोड २० लाख कित्ता शेयर निष्काशन गरेको छ । उक्त शेयर निष्काशन पश्चात कम्पनीको चुक्ता पूँजी ४ अर्ब रुपैयाँ पुगेको छ । यस्तै कम्पनीको जगेडा कोषमा १ अर्ब ४७ करोड ९९ लाख रुपैयाँ, जीवन बीमा कोषमा ६ खर्ब ६३ करोड ४८ लाख रुपैयाँ र महाविपत्ती कोषमा १५ करोड ५ लाख रुपैयाँ सञ्चित रहेको छ । यस अवधिमा कम्पनीको प्रतिशेयर आम्दानी १५ रुपैयाँ ४४ पैसा र नेटवर्थ १५८ रुपैयाँ २३ पैसा रहेको छ ।
