काठमाडौं । समावेशी बीमासम्बन्धी अन्तर्राष्ट्रिय सम्मेलन आज कात्तिक ५ गतेबाट काठमाडौँमा शुरु हुँदैछ। यो सम्मेलन कात्तिक ९ गतेसम्म चल्नेछ। सम्मेलनका लागि आवश्यक सबै तयारी भइसकेको आयोजक समितिले जनाएको छ। होटल याक एन्ड यतीमा आयोजना हुने सम्मेलनमा विश्वभरका ५० भन्दा बढी मुलुकबाट बीमा, लघु बीमा, समावेशी बीमा र पुनर्बीमासम्बन्धी विज्ञहरुको सहभागिता रहनेछ। सम्मेलनमा गैरसरकारी संस्थाहरु, विकास–सहायता संस्थाहरु, नियामक निकायहरु, नीति विशेषज्ञहरु र बीमा उद्योगका विज्ञहरुसहित विश्वभरबाट ४०० भन्दा बढी सहभागी हुने अपेक्षा गरिएको छ। यी सबै न्यून आय भएका र जोखिममा परेका परिवारहरुका लागि समावेशी बीमा समाधान प्रवर्द्धनको क्षेत्रमा सक्रिय संस्थाहरु हुन् । पहिलोपटक यो सम्मेलनको आतिथ्यताको अवसर पाएको नेपालले सम्मेलनका माध्यमबाट अन्तर्राष्ट्रिय क्षेत्रमा नेपालको बीमा बजारलाई चिनाउने अवसरका रुपमा सदुपयोग गर्न खोजेको छ। बीमा बजारलाई चिनाउने र सँगै पर्यटन प्रवर्द्धनमा समेत योगदा पुर्याउन सकिने आयोजकको विश्वास छ। सम्मेलनको २० औँ संस्करण म्युनिख रि फाउन्डेसन र माइक्रोइन्स्योरेन्स नेटवर्कको सहकार्यमा नेपाल बीमक संघ, जीवन बीमक संघ नेपाल, नेपाल लघु बीमक संघ र नेपाल बीमा प्राधिकरणले संयुक्त रुपमा आयोजना गर्न लागेका हुन्। भोलिको उद्घाटनसत्रपछि दोस्रो दिन कात्तिक ६ गते पत्रकार सम्मेलन हुनेछ। पत्रकार सम्मेलनमा नेपाल बीमा प्राधिकरणका अध्यक्ष सूर्यप्रसाद सिलवालले मन्तव्य राख्नेछन्। बीमक संघका अध्यक्ष चंकी क्षेत्री, म्युनिख रि फाउन्डेसनका उपाध्यक्ष डर्क रेनहार्ड र माइक्रोइन्स्योरेन्स नेटवर्कको बोर्डका अध्यक्ष लोरेन्जो चानले पत्रकार सम्मेलनमा सम्मेलनको उद्देश्यबारेमा प्रकाश पार्नेछन्।