काठमाडौं । दोर्दी खोला जलविद्युत् कम्पनी लिमिटेडले आज जेठ ११ गतेदेखि अवितरित शेयर लिलामी प्रक्रियामार्फत बिक्रीमा ल्याएको छ । कम्पनीले यसअघि १ः१ अनुपातमा प्रतिशेयर १०० अंकित दरका १ करोड ५ लाख ४२ हजार ६०४ कित्ता हकप्रद खुला गरेको थियो । जसअन्तर्गत मागअनुसार ८५ लाख ९५ हजार ९२८ कित्ता शेयर बिक्री भइसकेको छ । बाँकी बाँडफाँटमा नपरेको १९ लाख ४६ हजार ६७६ कित्ता शेयर लिलामीमार्फत बिक्रीमा ल्याएको हो । कुल शेयरमध्ये संस्थापकतर्फको १४ लाख ५० हजार ९९७ कित्ता शेयर असार ७ गतेसम्म लक इनमा रहनेछ । बाँकी सर्वसाधारण समूहको ४ लाख ९५ हजार ६९७ कित्ता भने लकइनमा नरहेको शेयर हो । उक्त शेयर जोकोही व्यक्ति, कम्पनी, संघसंस्थाले खरिद गर्न पाउनेछन् । इच्छुक लगानीकर्ताले आफूले के कति दररेटमा लिने हो सोको विवरण खुलाई जेठ १९ गतेसम्म गोप्य शिलबन्दी बोलपत्र पेश गर्नुपर्नेछ । शेयर खरिदका लागि आवेदन दिँदा न्यूनतम १०० कित्ता वा सोभन्दा बढी सबै कित्ताका लागि आवेदन दिन सकिनेछ । दरखास्त फाराम भने कम्पनीको कर्पोरेट कार्यालय, त्रिपुरेश्वर, बिक्री प्रबन्धक सानिमा क्यापिटल लिमिटेड, नक्साल काठमाडौं वा सानिमा बैंकका विराटनगर, पर्सा, कास्की, रुपन्देही, बाँके, सुर्खेत, धनगढी, लमजुङलगायतका स्थानमा पाइनेछ । सोही स्थानमा फाराम तथा रकम जम्मा गर्न सकिने बताइएको छ ।