काठमाडौं । एभरेष्ट बैंक लिमिटेडले चालु गत आर्थिक वर्षको चौथो त्रैमाससम्ममा ४ अर्ब ९१ करोड ८१ लाख रुपैयाँ खुद नाफा आर्जन गरेको छ। यो अघिल्लो आर्थिक वर्षको सोही अवधिको तुलनामा ३२.८१ प्रतिशत बढी हो । अघिल्लो आर्थिक वर्ष बैंकले ३ अर्ब ७० करोड ३२ लाख रुपैयाँ खुद नाफा आर्जन गरेको थियो । खुद ब्याज आम्दानीसँगै सञ्चालन आम्दानीमा वृद्धि हुँदा बैैंकको खुद नाफा बढ्न बढेको हो । समीक्षा अवधिमा बैंकको खुद ब्याज आम्दानी ९ अर्ब १२ करोड ९३ लाख रुपैयाँ छ । यो अधिल्लो वर्षको तुलनामा १९।३६ प्रतिशतले बढेको हो । साथै, बैंकको सञ्चालन मुनाफा ३१।६३ प्रतिशतले बढेर ७ अर्ब ४५ करोड ४२ लाख रुपैयाँ पुगेको छ । यस अवधिमा बैंकको वितरण योग्य मुनाफा ४ अर्ब ९५ करोड ४४ लाख रुपैयाँ रहेको छ । यस अवधिसम्ममा बैंकले दुई खर्ब ९८ अर्ब ८१ करोड ८४ लाख रुपैयाँ निक्षेप संकलन गरेको छ भने दुई खर्ब १३ अर्ब ६२ लाख रुपैयाँ कर्जा प्रर्वाह गरेको छ । चुक्ता पूँजी १२ अर्ब ९४ करोड ४४ लाख रुपैयाँ रहेको बैंकको रिर्टन्ड अर्निङ ४ अर्ब ९५ करोड ४४ लाख रुपैयाँ, र जगेडा कोषमा १३ अर्ब ८८ करोड ५९ लाख रुपैयाँ सञ्चित छ । समीक्षा अवधिमा बैंकको खराब कर्जा ०.७१ प्रतिशतबाट घटेर ०.३८ प्रतिशत छ । नाफासँगै बैंकको प्रतिशेयर आम्दानी पनि बढेको छ । समीक्षा अवधिमा कम्पनीको यस्तो आम्दानी ६ रुपैयाँ ५२ पैसा बढेर ३७ रुपैयाँ ९९ पैसा पुगेको छ । बैंकको प्रतिशेयर नेटवर्थ २४७ रुपैयाँ ३९ पैसा रहेको छ । असार मसान्तसम्ममा बैंकको मूल्य आम्दानी अनुपात १८.४७ गुणा छ ।