काठमाडौं । ऊर्जा, जलस्रोत तथा सिँचाइ एवं भौतिक पूर्वाधार तथा यातायात मन्त्री कुलमान घिसिङले पदबाट राजीनामा दिने तयारी गरेका छन् । सोमबार बसेको मन्त्रिपरिषद् बैठकमा पार्टीमा खुलेर लागिसकेकाले निर्दलीय सरकारमा नबस्न प्रधानमन्त्री सुशीला कार्कीले आग्रह गरेपछि कुलमानले राजीनामाको तयारी गरेको उनी निकट स्रोतले जनाएको छ । सरकारमा दलगत पृष्ठभूमिका व्यक्ति मन्त्री बनेको विषयलाई लिएर चौतर्फी आलोचना बढेपछि प्रधानमन्त्रीले मन्त्रिपरिषद् बैठकमा नै यस्तो बताएकी थिइन् । कार्कीले घिसिङसहित, सञ्चार तथा सूचना प्रविधि मन्त्री जगदीश खरेल र युवा तथा खेलकुद मन्त्री बब्लु गुप्तालाई पनि राजीनामा दिन आग्रह गरेकी थिइन् । घिसिङ राष्ट्रिय स्वतन्त्र पार्टी रास्वपा का उपसभापति हुन् भने खरेल र गुप्ता पनि सोही पार्टीबाट चुनाव लड्ने तयारीमा छन्। मन्त्रिपरिषद्मा घिसिङले आफू कुनै पनि पार्टीमा नरहेको बताएका थिए । तर त्यो अभिव्यक्तिपछि रास्वपामा समेत प्रश्न उठेपछि उनी राजीनामाको मुडमा पुगेका हुन् ।