काठमाडौं । कृषि क्षेत्रमा तोकिएको लगानी गर्न नसकेको भन्दै राष्ट्र बैंकले नेपाल बंगलादेश बैंकलाई ४ करोड रुपैयाँ जरिवाना गरेको हो । तर एनबी बैंकले गत आर्थिक वर्षमा कृषिमा मात्रै थोरै मात्रै रकम  कम भएको बताउँदै यसपाली भने कृषिमा पनि तोकिएको लगानी पुग्ने दाबी गरेको छ । कृषिमा थोरै लगानी भए पनि अन्य प्राथमिकताप्राप्त क्षेत्रमा भने राष्ट्र बैंकले तोकिए अनुसारको लगानी भएको बैंकले स्पष्ट पारेको छ ।

राष्ट्र बैंकले प्राथमिकता प्राप्त क्षेत्रमा कुल कर्जाको २५ प्रतिशत अनिवार्य लगानी गर्नुपर्ने व्यवस्था गरेको छ । जसमध्ये १० प्रतिशत कर्जा लगानी कृषि क्षेत्रमा नै हुनुपर्छ । तर गत आर्थिक वर्ष २०७५÷७६ मा एनबी बैंकले ९ प्रतिशत पनि पुर्याउन नसकेको राष्ट्र बैंकले बताएको छ ।

कुनै बैंकले तोकिएको क्षेत्रमा कर्जा लगानी नगरे लगानी नभएको कर्जाको ब्याज बराबर जरिवाना राष्ट्र बैंकले गराउने गरेको छ । तर एनबी बैंकले चालु आर्थिक वर्षको ६ महिनामै तोकिएको लगानी पुरा भइसकेको बताएको छ ।