काठमाडौं । सरकारले आर्थिक नीतिमै मर्जरलाई प्राथमिकता दियो । सोही अनुरुप बैंकिङ क्षेत्रमा मर्जरको लहर नै चलेको छ । सबैले मर्जरका लागि ढोका खुल्ला पनि गरिसकेका छन् । बैंकिङ क्षेत्रमा लामो समयदेखि बहसको विषय बनेको मर्जर बीमा क्षेत्रमा पनि अघिल्लो वर्षदेखि पसेको थियो । अघिल्लो वर्ष बीमा कम्पनीहरुको नियमनकारी निकाय बीमा समितिले पनि पुँजी वृद्धिको लागि मर्जरको अस्त्र प्रयोग गरेको थियो ।
बीमा समितिले गत आर्थिक वर्षको अन्त्यसम्ममा जीवन बीमा कम्पनीहरुका लागि २ अर्ब रुपैयाँ र निर्जिवन बीमा कम्पनीहरुका लागि १ अर्ब रुपैयाँ पुर्याउन निर्देशन दिएको थियो । बीमा समितिले पुँजी वृद्धिका लागि निर्देशन दिएसँगै शुरु भएको बीमा मर्जर अभियान पनि बैंकिङ क्षेत्रकै बाटोमा जाने देखिएको छ । बैंकिङ क्षेत्रमा जस्तै बीमा कम्पनीहरुले पनि बोनश तथा हकप्रद सेयर जारी गरेर पुँजी वृद्धिको अभियान चलाएका छन्
४० वटा बीमा कम्पनीहरुमध्ये अहिलेसम्म ४ वटा कम्पनीहरुले मात्रै बीमा समितिले तोकेको पुँजी पुर्याएका छन् । बाँकी केही कम्पनीहरुले हकप्रद जारी गर्ने प्रक्रिया थालिसकेका छन् । अन्य कम्पनीहरु पनि हकप्रदको तयारीमा प्रक्रिया मिलाउँदै छन् । यदि बीमा समितिले हकप्रद जारी गर्ने सहमति नदिएको भए अहिले बीमा कम्पनीहरुलाई मर्जरबाहेकको विकल्प थिएन ।
बीमा कम्पनीहरुलाई फोर्स मर्जरमा लाने नीति बीमा समितिको नभएको अध्यक्ष चिरञ्जीवी चापागाईंले सार्वजनिक गरिसकेका छन् । सहमतिअनुसार नै बीमा कम्पनीहरुले हकप्रद जारी गर्न धमाधम अनुमति लिइरहेको समेत जानकारी दिएका छन् ।
