काठमाडौं। मेलम्चीको पानी जस्तै सपना बनेको बाहिरी चक्रपथले फेरि चर्चा पाउन थालेको छ । सोमबार प्रधानमन्त्री केपी शर्मा ओलीको संयोजकत्वमा बसेको लगानी बोर्डको ४० औँ बैठकले बाहिरी चक्रपथ निर्माण गर्ने जिम्मा चिनियाँ कम्पनीलाई दिने निर्णय गरेपछि फेरि चर्चामा आएको हो । जग्गा मुआब्जाको विषयमा निर्णय लिन नसकेको सो आयोजना अहिले पनि के गर्ने भन्ने निर्णय भएको छैन । बोर्ड बैठकले उपत्यकाको बाहिरी चक्रपथ विस्तार गर्न चाइना कम्यूनिकेशन कन्स्ट्रक्सन कम्पनीको आशयपत्र स्वीकृत गरेको छ।
७२ किलोमिटर लम्बाई रहने यो चक्रपथ निर्माणका लागि सुरु लागत ६ अर्ब लाग्ने भनिएता पनि अहिले रकम बढि सकेको छ। यो सडक ८ लेनको हुनेछ। जसका लागि ७ हजार २ सय रोपनी जग्गा आवश्यक हुन्छ।
नागढुंगामा सुरुङमार्गको ठेक्का सम्झौता
यसैगरी काठमाडौंको नागढुंगादेखि धादिङको सिस्नेखोलादेखि जोड्ने नागढुंगा सुरुङमार्ग निर्माणका सम्झौता भएको छ । सडक विभाग अन्तरगतको नागढुंगा सुरुङमार्ग आयोजनाले जिम्मा जापानी कम्पनी हाज्मारआन्दो जेभीसँग ठेक्का सम्झौता गरेको हो । तिहारलगत्तैबाट सुरुङमार्ग निर्माणको काम थालिने बताइएको छ । काम थालेको ४२ महिनामा सुरुङमार्ग तयार पार्ने लक्ष्य राखिएको छ । यो आयोजना करिब १५ अर्ब २५ करोडको लागतमा बन्न लागेको हो । करबाहेक सुरुङमार्ग साढे १३ अर्बमा ठेक्का लागेको हो ।
यो सुरुङमार्ग निर्माणका लागि सरकारले यो वर्ष ६ अर्ब २७ करोड विनियोजन गरेको थियो । टेण्डर मूल्यांकन प्रक्रियामा अलमलिँदा यो आयोजना ढिलाई भएको हो । सुरुङमार्गको डिजाइन जापान सरकारले गरेको हो । सुरुङमार्गका लागि जापान सरकारले १५ अर्ब रुपैयाँ ऋण दिने सम्झौता भइसकेको छ । जापानले ०।०१ प्रतिशत व्याजदरमा ४० वर्षका लागि ऋण उपलब्ध गराउने सम्झौतामा उल्लेख छ ।
