काठमाडौं । करिब २ करोड रुपैयाँ बैंकबाट अनधिकृत रुपमा व्यक्तिगत खातामा ट्रान्सफर भएको घटना सार्वजनिक भएपछि बैंकले पासवर्ड दुरुपयोगका कारण घटना भएको भन्दै आफ्नो सिष्टम सुरक्षित रहेको दाबी गरेको हो। बैंकिङ्ग सिष्टम सुरक्षित रहेको र ग्राहकहरुको निक्षेप पनि सुरक्षित रहेको दाबी बैंकका प्रवक्ता हिमलाल पौडेलले गरेका छन् । लहान शाखाका ब्राञ्च म्यानेजरको कमजोरीका कारण करिब २ करोड रुपैयाँ अनधिकृत रुपमा व्यक्तिगत खातामा ट्रान्सफर भएको भने उनले स्वीकार गरेका छन् । बैंकले प्रयोग गरिरहेको टी ट्वान्टी फोर सिस्टम बैंकिङ्ग प्रणालीमा प्रयोग हुने उत्कृष्ट बैंकिङ सिस्टम रहेकाले निक्षेपकर्ताको रकम पूर्ण रुपमा सुरक्षित रहेको बैंकले जनाएको छ । घटनामा संलग्नताको आरोपमा ९ जनालाई प्रहरीले मंगलबार नै पक्राउ गरिसकेको छ।

एकै पटक नौं÷नौं लाख रुपैयाँका दरले पैसा झिकिएपछि बैंक ब्यवस्थापनले निगरानी बढाउँदा यो तथ्य पत्ता लागेको हो । गैरकानुनी रुपमा रकम झिकिएको पाइएपछि बैंकले प्रहरीमा उजुरी दिएको थियो। पैसा झिक्ने कर्मचारीहरुलाई पक्राउ परिसकेका छन् । तीन जना कर्मचारीहरुको युजर प्रयोग भएको जनाइएको छ । बैंकले आफ्नो सफ्टवेयर भित्र छिर्नका लागि कर्मचारीहरुलाई ब्यक्तिगत युजर र पासवर्ड दिन्छ। त्यही प्रणालीभित्र छिरेपछि उनीहरुले बैंकको नाफा–घाटा खातामा जम्मा भएको रकमलाई आफ्नो खातामा सारेका थिए ।