एजेन्सी । विश्वभर कोरोनाको आतंक भइसक्दा पनि माक्स लगाउने र लकडाउनको विषयमा फरक मत राख्दै आएको अमेरिका पछिल्लो समय कोरोनाको चपेटामा छ । ४० हजार हाराहारी मान्छेको ज्यान गएपछि बल्ल अमेरिकाले विश्वले अपनाएका प्रविधिको नक्कल गर्न थालेको छ । अमेरिकाको न्युयोर्कमा कोरोना महामारीले तिब्र रुप लिएपछि त्यहाँको स्थानीय प्रशासनले कडा नियम जारी गरेको छ । न्युयोर्कका गभर्नर एन्ड्रयु कुओमोले शुक्रबार एक विज्ञप्ती जारी गरी अब प्रत्येक नागरिकले आफ्नो अनुहार छोप्नैपर्ने कडा निर्देशन जारी गरेका हुन् । उनले प्रत्येक नागरिकले मास्क लगाउन र सार्वजनिक ठाउँमा रहँदा अनिवार्य अनुहार छोप्नुपर्ने निर्देशन जारी गरेका छन् । विज्ञप्तिमा सामाजिक दुरीलाई पनि कडाईका साथ लागू गर्नुपर्नेमा जोड दिइएको छ । यो नियममा २ वर्षभन्दा मुनिका बालबालिकालाई भने छुट दिइएको जनाइएको छ । यसअघि गभर्नर कुओमोले १५ मेसम्मका लागि सबै नागरिकहरुलाई घर बाहिर ननिस्कन आह्वान गरेका थिए । उनले यसअघि यो विषयमा उत्तरपूर्वी राज्यहरुसँग छलफल गरेर अघि बढ्ने अर्को महिना समीक्षा गर्ने बताउँदै आएका छन् ।
राष्ट्रपति ट्रम्प र गभर्नरहरुको यो टक्करलाई निकै अर्थपूर्ण रुपमा लिइएको छ । राष्ट्रपति ट्रम्प न्युयोर्क र उत्तरपूर्वी राज्यका जनताहरुको जीवन रक्षाका लागि गम्भीर नभएको आरोप गभर्नरहरुले लगाउँदै आएका छन् । अमेरिकामा अहिलेसम्म संक्रमणका कारण ३८ हजारभन्दा बढीको मृत्यु भैसकेको छ भने संक्रमित हुनेको संख्या ७ लाख बढी पुगेको छ ।