वीरगञ्ज । तत्कालको रिसलाई नियन्त्रणमा लिन कसक्दा कति ठूलो दुर्घटना निम्तिन्छ भन्ने घटना वीरगञ्जमा घटेको एउटा घटनाले देखाएको छ । ७ वर्षे छोरीको हत्या गरेको अभियोगमा वीरगञ्ज महानगरपालिका–१ छपकैयाका २९ वर्षका सञ्जय सर्राफ भन्ने सञ्जयकुमार साह सोनार पक्राउ परेका छन् । सर्राफले ७ वर्षकी छोरी अंशुकुमारीको हत्या गरेको तथ्य खुलेपछि उनी पक्राउ परेका हुन् । २०७६ चैत ११ गते दिउँसो सवा २ बजे अंशुलाई घरको माथिल्लो कोठामा भित्तामा गाडिएको किलामा सलले पासो लगाई रहेको अवस्थामा भेटिएको भन्दै बाबु सञ्जयले पासो खोली तत्कालै नारायणी अस्पतालमा पुर्याएको र अस्पतालले मृत घोषणा गरेको दाबी परिवारले गरेको थयो । प्रहरी अनुसन्धानका क्रममा बाबुले घाँटी थिचेर हत्या गरेको खुलेको छ । २०७७ वैशाख ४ गते सञ्जयलाई पक्राउ गरी अनुसन्धान गर्दै जाँदा अंशुले आत्महत्या गरेको नभई हत्या भएको तथ्य खुलेको हो । सञ्जयले हत्या गर्ने नियतले नभई छोरीलाई तर्साउने उद्देश्यले घाँटी थिचेको तर, उनको मृत्यु भएको थियो। लकडाउन सुरु भएको दिन अंशुले बाहिर जान जिद्दी गरेपछि उनले पिटेका थिए । झन् जोडले रुन लागेपछि तत्कालका लागि चुप लगाउन सञ्जयले छोरीको घाँटी थिचेको स्वीकार गरेका छन् । छोरीको मृत्यु भएपछि झस्केका सञ्जयले आफू सजायबाट बच्नका लागि छोरीले आत्महत्या गरेको भनी नाटक रचेका थिए । प्रारम्भिक बयानमा उनले हत्या गरेको स्वीकार गरेको जिल्ला प्रहरी कार्यालय पर्साले जनाएको छ ।
