काठमाडौं । कोरोना भाइरस विरुद्धको युद्धका लागि सरकारले स्थापना गरेको कोरोना रोकथाम तथा उपचार कोषमा दिनदिनै रकम थपिनेक्रम बढ्दो छ । व्यक्तिगत तथा संस्थागत रुपमा रुपमा सहयोग गर्ने दाताहरु बढ्ने क्रममा छन् । यसै सिलसिलामा सानिमा बैंकले संस्थागत सामाजिक उत्तदायित्व बहन गर्दै कोरोना भाइरस (कोविड–१९) को महामारी नियन्त्रण तथा उपचारको सहयोगका लागि नेपाल सरकारलाई रु १ करोड ६८ लाख सहयोग उपलब्ध गराएको छ । जसअन्तर्गत बैंकका कर्मचारीहरुको तर्फबाट रु ३३ लाख प्रदान गरिएको छ । केन्द्रीय सरकार अन्तर्गत कोरोना भाइरस संक्रमण, रोकथाम तथा उपचार कोषमा रु ९८ लाख र प्रत्येक प्रदेश सरकारलाई रु १० लाखका दरले ७० लाख सहयोग रकम उपलब्ध गराइएको छ ।बैंकका हरेक प्रादेशिक कार्यालयका प्रतिनिधिहरुमार्फत् आ–आफ्ना प्रदेश सरकारलाई सो सहयोग रकम हस्तान्तरण तथा केन्द्र सरकारको कोरोना भाइरस संक्रमण, रोकथाम तथा उपचार कोषमा रकम जम्मा गरेको हो । यसबाट कोरोना भाइरसको संक्रमण रोकथाम तथा उपचारका लागि सरकारलाई मद्दत पुग्ने विश्वास बैंकले लिएको छ । यस प्रतिकूल परिस्थितिमा बैंकले काठमाडौं उपत्यकाभित्र र बाहिरका विभिन्न शाखाहरुबाट बैंकिङ्ग सेवा प्रदान गर्नुका साथै सर्वसाधारणको सुरक्षालाई ध्यानमा राख्दै विभिन्न डिजिटल बैंकिङ्ग च्यानलहरुमार्फत् निःशुल्क सेवा प्रदान गर्दै आइरहेको छ ।