एजेन्सी । भेनेजुयलाको एउटा जेलमा झपड हुँदा ४६ जनाको मृत्यु भएको छ । भेनेजुयलाको पश्चिमी राज्य पोर्टुगुएसाको जेलमा भएको सो झडपमा परी थप ६० जना घाइते भएको अल जजिराले जनाएको छ । भेनेजुयलाकी जेलमन्त्री आइरिस भरेलाले कैदीहरुले जेलबाट भाग्ने प्रयासपछि यो झडप भएको बताएकी छिन् । उनका अनुसार यो झडपको क्रममा जेलका निर्देशकलाई पनि गोली लागेको छ । विपक्षी दलका सांसद मारिया बियट्रिज मार्टिनेजले कैदीहरुको परिवारलाई जेलमा भेट गर्न रोक लगाइएसँगै यो झडप भएको हो । भेनेजुयलाले कोरोना भाइरस (कोभिड १९) नियन्त्रणको लागि कैदीलाई परिवारसँग भेट्न रोक लगाएको हो । यसैची संयुक्त राष्ट्रसंघले यो घटनाको अनुसन्धानको माग गरेको छ । राष्ट्रसंघले जेलमा अत्यधिक भिड कम गर्न र आधारभूत अधिकारको प्रत्याभूति दिलाउन आग्रह गरेको छ । भेनेजुयलामा क्षमताभन्दा धेरै कैदी रहेका छन् । गत वर्ष पनि पोर्टुगुएसाकै अर्को जेलमा पनि झडप हुँदा २९ कैदीको मृत्यु भएको थियो ।