काठमाडौं । आफ्ना लागि नभई चिकित्सा क्षेत्रको सुधार र त्यसभित्रका विकृति विपसंगति विरुद्ध एक्लै आन्दोलनमा होमिएका सादगी व्यक्तित्व चिकित्सा शिक्षा सुधारका अभियन्ता डा. गोविन्द केसी त्रिभुवन विश्वविद्यालयको चिकित्साशास्त्र अध्ययन संस्थान (आईओएम) डिन नियुक्तिका विषयमा बोलेका छन् । त्रिविले वरिष्ठता मिचेर ३५औं वरियताकी डा. दिव्या सिंह शाह (प्रधानमन्त्रीकी निजी चिकित्सक) लाई डिनमा नियुक्त गरेकामा केसीले विरोध जनाएका छन् । वरिष्ठताकै आधारमा डिनलगायतका पदाधिकारीहरु नियुक्त हुनुपर्छ भनेर बारम्बार आन्दोलन गर्दै आएका डा. केसीले भनेका छन्, यसबाट व्यक्ति विशेषको नियुक्ति हुने वा नहुने भन्दा पनि वरिष्ठताको आधार भत्किने र सरकारलाई आफूखुशी कार्यकर्ताहरु भर्ती गर्न बाटो खुल्ने अवस्था सिर्जना भएको छ । वरिष्ठता मिचिँदा अहिले नै पार्टी कार्यकर्ताहरु आईओएमका विभिन्न पद हत्याउन मुसा दौडमा संलग्न भइसकेको भन्दै केसीले तीमध्ये सबैभन्दा अक्षम र संस्थालाई दोहन गर्न पल्केका कार्यकर्ताहरु अहिले पद पाउन नेता रिझाउन लागि परेको आरोप डा. केसीले विज्ञप्ति मार्फत् लगाएका छन् । डा. केसीले वरिष्ठताको आधारविना भएका नियुक्ति सच्याउन माग समेत गरेका छन्। विज्ञप्तिमा भनिएको छ, यी सारा समस्याका जडका रुपमा रहेको ओली–प्रचण्ड मनपरीतन्त्र विरुद्ध कडाभन्दा कडा आन्दोलन गर्न बाध्य हुनेछौं ।