अष्ट्रेलिया । विश्व स्वास्थ्य संगठनले समेत विश्वलाई स्वास्थ्य संकटकाल घोषणा गरेको बेला सिंगो विश्वलाई आतंकित बनाएको कोरोना भाइरसको संक्रमणबाट बच्न अष्ट्रेलियाले चीनबाट आउनेलाई आफ्नो देशमा प्रवेश गर्न रोक लगाउने घोषणा गरेको छ । अष्ट्रेलियाली सरकारले आफ्ना नागरिकबाहेक अरू कसैलाई पनि प्रवेश गर्न नदिने घोषणा शनिबार गरेको एजेन्सीहरुले जनाएका छन् । चीनमा पहिलोपटक देखिएको नोवेल कोरोना भाइरस अहिले विभिन्न फैलिन थालेपछि त्यसलाई नियन्त्रण गर्नका लागि अष्ट्रेलियाले यस्तो निर्णय लिएको अधिकारीहरुले बताएका छन् ।

अष्ट्रेलियाका प्रधानमन्त्री स्कट मोरिसनले भन्नुभयो, अष्ट्रेलियाका नागरिक, अष्ट्रेलियाका बासिन्दा, उनीहरुमा आश्रित, कानूनी संरक्षक तथा अविभावकलाई मात्रै चीनबाट अष्ट्रेलिया आउन अनुमति दिइनेछ । यो व्यवस्था शनिबारदेखि नै लागू भइसकेको समेत उहाँले जानकारी दिनुभएको छ । उहाँले नाकाहरुमा यसका लागि सम्पूर्ण व्यवस्था गरिसकिएको र सरकारी अधिकारीहरु तथा प्राविधिक र विज्ञहरु पनि खटाइ सकिएको बताउनुभयो । अष्ट्रेलियाको विदेश मन्त्रालयले आफ्ना नागरिकहरुलाई चीनको भ्रमणमा नजानसमेत सूचना जारी गरेको छ ।