० बैंकहरू मर्फत् बीमा कम्पनीले बिमालेख (बैकुरेन्स) बेच्दै आएकोमा यस वर्षको मौद्रिक नीतिमा सो कार्यलाई निरुत्साहित गरेको छ, त्यसले बीमा कम्पनीहरूमा कस्तो असर पर्ला ?
– बीमा र बैंकको सम्बन्ध भनेको नङ र मासुको जस्तो हुन्छ । बीमाबीना लगानी असुरक्षित हुन्छ । मौद्रिक नीतिले निरुत्साहन भन्दा पनि व्यवस्थित गर्न खोजेको जस्तो मलाई लागेको छ । सुव्यवस्थित भएमा अवश्य राम्रो असर पर्दछ ।
० नेपाली बीमा बजार अझै विस्तार भएको छैन, जीवन बिमाबाहेक नीर्जिवन बिमामा सवारी साधन, घर, आगजनी, पशु, बाली, चोरी, प्राकृतिक प्रकोप, दुर्घटना आदिको विस्तार कस्तो छ ?
– नेपाली बीमा बजार विस्तार उन्मुख छ र राम्रो गति लिँदैछ । भोलिका दिनमा अझ राम्रो हुन्छ । नयाँ नयाँ पोलिसी आउनेक्रम जारी छ ।
० आम्दानी कम भएको र अर्थतन्त्र फस्टाउन नसकेको वर्तमान अवस्थामा बीमा बजार कसरी बढ्ला ?
– बीमाले आफ्नो बजारको धेरै क्षेत्र त विस्तार गर्न बाँकी नै छ । विकासमुखी बजेट भएकाले बीमाले फड्को मार्छ ।
० बीमा त गर्यो तर दाबी गर्ने प्रक्रिया निकै झन्झटिलो छ भनिन्छ ? कतिपय अवस्थामा त कागजात पुर्याउनै नसकेर बीमा दाबी लिन नसकिने अवस्था छ भनिन्छ नि ?
– दाबी प्रक्रिया आगामी दिनमा अझ सहज हुन्छ । न्युनतम कागजात त पुरा गर्नैपर्छ । त्यसो भएन भने समाजमा अपराध बढ्न सक्छ ।
० जीवन र नीर्जिवन बिमाको चुक्ता पुँजी पुर्याउन हम्मेहम्मे परेको अवस्था छ यस्तो अवस्थामा मर्जरको सम्भावना कत्तिको छ ?
– सम्भावना भनेकै हुन पनि सक्छ भन्ने हो । आवश्यकताले यसलाई निर्धारण गर्दछ ।
० बीमाको बजार सानो छ, नयाँ जीवन बीमा कम्पनीहरू थपिएका छन्, नीर्जिवन बीमा कम्पनी पनि थपिने प्रक्रियामा छन् यस्तोमा अस्वस्थ प्रतिस्पर्धा त बढ्दैन ?
– स्वस्थ प्रतिस्पर्धा बजारको आवश्यकता हो । बीमा कम्पनी थपिँदा स्वस्थ प्रतिस्पर्धालाई सहयोग पुग्छ । बरु बजार, रोजगारी र बीमाको पहुँच बढ्छ ।
० बीमा क्षेत्रमा दक्ष जनशक्तिको खाँचो देखिन्छ, त्यसो हुनुमा मुलुकभित्रै राम्रो तालिमको व्यवस्था नहुुनु हो वा यस क्षेत्रमा उचित प्रतिफल नभएर रोजगारीको आकर्षण नदेखिएको हो ?
– हाल यस क्षेत्रमा नयाँ पुस्ताका स्मार्ट म्यानपावरको रुचि बढ्दै गएको छ । आवश्यकताअनुसार तालिम पनि स्वदेशमै लिन सकिन्छ ।
० नेपाली बीमकले विदेशी पुनर्विमा कम्पनीसँग बीमा गर्दा अधिकांश बीमा शुल्क विदेशिने गरेको वर्तमान सन्दर्भमा बीमा गरिएको रकम मुलुकभित्रै राख्न के कस्ता व्यवस्थाहरू हुँदैछन् ?
– हाल हामी नेपाल पुनर्विमालाई २० प्रतिशत अनिवार्य व्यापार दिँदै आएका छौं । आगामी दिनमा कम्पनीको क्षमता बढाउँदै नेपालमा पुनर्बिमाको अंश पनि आवश्यकताअनुसार बढाउन सकिन्छ ।
० बीमा बजार सुरधाका लागि तपाईंको सुझाव के छ ?
– सचेतना वृद्धि, केही बीमालाई अनिवार्य, करमा छूट, पहुँचमा वृद्धि, खरिद गर्न सहज र सरल । ग्राहकमु्खी घुम्ती बीमा, राष्ट्रिय सचेतना अभियान (घरदैलो कार्यक्रम) गर्नुपर्छ ।
० सबैलाई प्यान अनिवार्य भनिएको छ सम्भव होला ?
– विस्तारै सम्भव भैहाल्छ । प्रयास, प्रयोग र अभ्यास इमान्दारिताका साथ गर्यो भने असम्भव केही छैन ।
