काठमाडौं । अपराध र आपराधिक मनस्थिति कहाँ हुँदैन र ? स्वास्थ्य सेवालाई व्यापारको रुपमा विस्तार भइसकेको बेला प्रहरीले चोरी अभियोगमा दुई जना स्वास्थ्यकर्मीलाई पक्राउ गरेको छ । पक्राउ पर्नेमा सर्लाही घर भएका एमबीबीएस डाक्टर प्रविण मिश्र र महोत्तरी घर भएका अहेब रमेशकुमार शर्मा छन् । महानगरीय प्रहरी परिसर, जावलाखेलले चोरीमा संलग्नता देखिएपछि उनीहरुलाई पक्राउ गरेको हो । पाटन अस्पतालको पोटेबल अल्ट्रासाउण्ड मेसिन हराएकोमा उनीहरुको संलग्नता देखिएपछि पक्राउ गरिएको बताइएको छ ।
१७ जेठमा बिहान साढे ८ बजे अल्ट्रासाउण्ड सर्भिसिङ कम्पनीबाट भन्दै दुवै जना अस्पतालमा छिरेका थिए । आईसीयू कक्षमा केही नर्स पनि थिए । त्यतिवेला उनीहरुले पोर्टेबल अल्ट्रासाउण्ड मेसिन हेरेको जस्तो गर्दै नर्सको आँखा छलेर उम्काउन सफल भएका थिए । लगत्तै अस्पताल प्रशासनले ललितपुर प्रहरीमा घटनाबारे जानकारी दिएको थियो । बानेश्वरमा एक जना साथीको कोठामा उनीहरुले उपकरण लुकाएको अवस्थामा फेला पारिएको बताइएको छ ।