एजेन्सी । कोरोना भाइरस खोपको असर छोटो समय मात्र रहन्छ कि भन्ने आम नागरिकको चासो र चिन्तामा केही राहत हुने भएको छ । हालै सार्वजनिक भएका दुई वटा अध्ययनले खोप लगाएपछि हाम्रो शरीरमा उत्पन्न हुने प्रतिरोधात्मक क्षमता एक वर्ष वा जीवनभर नै रहन पनि सक्ने देखाएका छन् ।
अनुसन्धानले एकचोटि कोरोना लागेर निको भइसकेका व्यक्तिले पहिलो खोप लगाएपछि दोस्रो डोज नलिए पनि हुने देखाएको छ। एकचोटि पनि संक्रमण नभएको व्यक्ति भने दुवै खोप लिनुपर्ने अध्ययनमा देखिएका छन् । अन्तर्राष्ट्रिय जर्नल ‘नेचर’ मा प्रकाशित भएको वैज्ञानिक अध्ययनले कोरोना लागेर निको भएका व्यक्तिमा हड्डीको भित्री तहमा रहेका कोषहरूबाट भाइरससँग लड्ने एन्टिबडी विकास भएको बताएको छ ।
बायोआर–एक्सआइभी’ नामक अनलाइनमा प्रकाशित अर्को अध्ययनमा कोरोनासँग लड्ने एन्टिबडी संक्रमण भएको कम्तिमा १२ महिनासम्म सक्रिय रहने र यो समयमा उक्त एन्टिबडी थप बलियो हुँदै जाने उल्लेख छ। कोरोना भाइरसको संक्रमणपछि र यसको खोप लगाएपछि विकास हुने एन्टिबडी लामो समय सक्रिय रहेन तथ्य अध्ययनमा रहेको वैज्ञानिकहरुले बताएका छन् । कोरोना संक्रमणपछि हाम्रो शरीरमा जुन एन्टिबडी विकास हुन्छ, त्यो एन्टिबडी खोपको असरले अझ बलियो भएर आउँछ । यस्तो बलियो एन्टिबडी कोरोना भाइरसका विभिन्न प्रकारसँग लड्न सक्षम हुन्छ। त्यसैले, एकचोटि संक्रमण भएर निको भइसकेको व्यक्तिले दोस्रो डोज खोप नलगाए पनि फरक नपर्ने अनुसन्धानदाताहरुले बताएका छन् । कोरोना संक्रमणपछि प्राकृतिक रूपले शरीरमा विकास हुने एन्टिबडीको दाँजोमा खोप लगाएपछि आउने एन्टिबडी फरक हुने अध्ययनको निष्कर्ष छ । कोरोना संक्रमण भइसकेपछि शरीरले ठूलो परिमाणमा एन्टिबडी विकास गर्ने अध्ययनमा उल्लेख छ । केही वैज्ञानिकहरुका अनुसार कोरोना संक्रमणको केही महिनासम्म एन्टिबडी सक्रिय रहन्छ। त्यसपछि हड्डीको भित्री तहमा गएर निस्क्रिय अवस्थामा बस्छ । तर, जब कोरोना भाइरसले फेरि हमला गर्छ, तब एन्टिबडीले तुरुन्तै आफ्नो काम सुरू गर्छ र भाइरससँग जुध्न सक्रिय हुन थाल्छ ।
कोरोना लागेर निको भइसकेको व्यक्तिले कम्तिमा एक डोज खोप लगाएको छ भने उसको शरीरमा एकदमै बलियो प्रतिरोधक क्षमता विकास भएको पाइएको अनुसन्धानबाट देखिएको छ। (न्यु्योर्क टाइम्स)