काठमाण्डौ । चिसो मौसममा फैलिने भनिएको कोरानाको संक्रमणले विश्वलाई आतंकि बनाइरहँदा नेपाल त्राहीमाम अवस्थामा छ । नेपालमा कोरोनाको संमण दुई जनामा देखिए पनि उनीहरु उपचारपछि स्वस्थ भइसकेका छन् । अन्य कसैमा त्यसको लक्षण अहिलेसम्म देखिएको छैन । नेपाल सरकारले रोग फैलिनसक्ने भन्दै सीमा नाकाहरु बन्द गरेको छ भने विदेशबाट आउने जो कसैले १४ दिन क्वारेनटाइनमा बस्नुपर्ने नयाँ नियम सार्वजनिक गरेको छ । चिसो मौसमबाट गर्मीतिर फड्को मार्ला र कोरोनाको आतंक बन्द होला भन्ने सोचाई राखिरहँदा फेरि गर्मीको अर्को महामारी डेंगु संक्रमितको संख्या थपिन थालेको छ । पुसको दोस्रो हप्तादेखि अहिलेसम्ममा ३६ जना डेङ्गीका बिरामी फेला परेको ईपीडीमियोलोजी तथा रोग नियन्त्रण महाशाखाले जनाएको छ ।
विभिन्न अस्पतालमा उपचारका लागि पुगेका ३६ जना बिरामीमा डेङ्गीको सङ्क्रमण देखा परेको महाशाखाले जनाएको छ । महाशाखाले सार्वजनिक गरेको तथ्याङ्कअनुसार प्रदेश १ अन्तर्गत झापामा १, मोरङमा ३ र सुनसरीमा २ गरी ६ जना डेङ्गीको बिरामी फेला परेका हुन् ।
यस्तै वाग्मती प्रदेश अन्तर्गत नुवाकोटमा १, काठमाण्डौमा ३, ललितपुरमा ३, रामेछापमा १ र मकवानपुरमा १ गरी ९ जनामा डेङ्गीको लक्षण भेटिएको छ । गण्डकी प्रदेशको गोरखामा १, म्याग्दीमा १, कास्कीमा २ र नवलपरासी सुस्ता पूर्वमा १ गरी ५ र प्रदेश ५ मा नवलपरासी सुस्ता पश्चिममा १, रुपन्देहीमा ११, कपिलवस्तुमा १ र बाँकेमा १ गरी १४ जना डेङ्गीकाका बिरामी भेटिएका छन् । सुदूरपश्चिम प्रदेशअन्तर्गत डडेलधुरामा १ र कैलालीमा १ गरी २ जना बिरामी भेटिएका छन् । मौसम परिवर्तनसँगै नेपालमा डेङ्गीका बिरामी भेटिएको महाशाखाले जनाएको छ ।