काठमाडौं । बाँकेको कोहलपुरमा ट्रकले एक बालिकालाई ठक्कर दिएपछि उत्पन्न तनावले उग्र रुप लिँदा कोहलपुरमा कफ्र्यु आदेश जारी भएको छ । अवस्थालाई नियन्त्रणमा लिन नसकेपछि जिल्ला प्रशासन कार्यालय बाँकेले कोहलपुरमा कर्फ्यू आदेश जारी गरेको हो । ट्रकको ठक्करबाट गम्भीर घाइते भएकी छात्रालाई उपचारका लागि सेनाको हेलिकप्टरबाट काठमाडौं ल्याइएको छ ।
प्रदर्शनकारीको ढुंगामुढाबाट कोहलपुरका प्रहरी प्रमुख डीएसपी हेमराज शाहीसहित ९ जना प्रहरी घाइते भएका छन् । घाइतेहरुको अहिले कोहलपुर शिक्षण अस्पतालमा उपचार भइरहेको प्रहरीले जनाएको छ ।आइतवार बिहान कोहलपुर–नेपालगञ्ज सडकखण्ड अन्तर्गत हाइस्कुल चोकमा ट्रकको ठक्करबाट त्रिभुवन उच्च माध्यामिक विद्यालयमा कक्षा ७ मा अध्ययनरत कोहलपु–१० की प्रकृति चन्द गम्भीर घाइते भएकी थिइन् ।
घटनापछि विद्यार्थीहरुको समूहले ट्रकमा आगजनी गरेका छन् । स्थिति तनावग्रस्त भएपछि प्रहरीले बल प्रयोग गरेको छ । केही राउण्ड हवाई फायर पनि भएको छ । तिव्र गतिमा आएको ट्रकले बालिकालाई ठक्कर दिएपछि ब्याक गरेर फेरि किचेको आरोप स्थानीयहरुले लगाइरहेका छन् ।
आक्रोशित विद्यार्थी र स्थानीयहरुले ठक्कर दिने ट्रकमा आगजनी गर्नुका साथै करिब ७ वटा सवारीका साधानमा तोडफोड गरेका छन् । विद्यार्थीहरुले राजमार्ग र सडक ठप्प पारेका छन् । स्थिति नियन्त्रण लिन प्रहरीले १५ राउण्ड हवाइ फायर गरेको छ। दर्जनौं राउन्ड अश्रुग्यास हाने पनि स्थिति झन झन् उग्र बन्दै गएपछि कफ्र्यु आदेश जारी गर्ने निर्णय भएको बताइएको छ । घटनाबारे जानकारी गराउन जाँदा स्थानीय प्रहरीले उल्टै अभद्र व्यवहार देखाएको भन्दै स्थानीय प्रहरी प्रशासनप्रति पनि आक्रोशित देखिएका छन् ।
