काठमाडौँ । विविध क्षेत्रमा बीमा विस्तार गर्दै जोखिम न्यूनिकरण गर्ने सिलसिलामा चौरी पालक किसानका लागि लागि थप सुविधा सहित चौरी बीमा सिन्धुपाल्चोकमा सुरु भएको छ । चौरी पालनका सिलसिलामा मौसम अनुसार गोठ सार्दै जाँदा चौँरी बिरामी भएर मर्ने जोखिम बढी हुने सन्दर्भमा किसानले २५ प्रतिशत र ७५ प्रतिशत सरकारी अनुदान सहित चौरीको बीमा गर्न थालिए पश्चात् सिन्धुपाल्चोकका चौरी किसानलाई ठूलो राहत मिलेको छ ।

अब चौरी पालनको सिलसिलामा चौरी मर्दाको अवस्थामा पनि किसानलाई खासै ठूलो नोक्सानी नहुने अवस्था सिर्जना भएको छ । सिन्धुपाल्चोकको हेलम्बु गाउँपालिकाले सुरु गरेको यस्तो कार्यक्रममा किसानको आवद्धता निकै देखिन थालेको र उनीहरु गाउँपालिकाको यस निर्णयबाट निकै खुसी भएको बताइएको छ ।

चौँरी पकेट क्षेत्र बनाई किसानलाई व्यावसायिक पशुपालन तर्फ आकर्षित बनाउनका लागि गरिएको यस चौरी बीमा कार्यक्रममा हालसम्म करिब चार सय चौँरीको बीमा गरिएको बताइएको छ । बीमाका साथै गाउँपालिकाले चौँरीगोठका लागि मोबाइल चार्ज र बिजुली बाल्न मिल्ने सोलार प्यानलसहित उपकरण वितरण गर्दै किसानलाई यस पेशामा लाग्न अभिप्ररित गर्दैछ ।