काठमाडौं । काठमाडौं महानगरपालिकाका मेयर बालेन्द्र शाह बालेनले माघ ४ गते राजीनामा दिने बताएका छन् । आज पार्टी निकटकाहरुसँग ज्वागलमा भएको छलफलमा ४ गते राजीनामा दिएर पार्टी गतिविधिमा निस्कने बताएका हुन् । सुरेन्द्र चौधरी, लक्ष्मण थारु , करिस्मा कठरिया, कृष्ण न्यौपाने लगायतकालाई आफूले ४ गते राजीनामा बुझाउने बताएका हुन् । काठमाडौंको सबै काम सकेर ४ गते राजीनामा दिन्छु तपाइँहरू पनि काठमाडौं छोडेर जिल्लामा जानुहोस्, बालेनले भनेका थिए, चुनावी कार्यक्रम सुदूरपश्चिमबाटै सुरु गर्नुपर्छ । बालेनले सामाजिक सञ्जालमा पनि यस विषयमा सङ्केत गरेका छन् । ‘४ गते राजीनामा दिने र देश दौडाहामा अभियानमा निस्कने बताउनु भएको थियो रास्वपाका नेता सुरेन्द्र चौधरीले भने ‘उहाँले आफ्नो मनोनयन पछि देश दौडाहामा निस्कने कुरा गर्नुभएको छ । उनले चाडै चुनावी अभियानमा निस्कन आग्रह गरेपनि बालेनले महानगरपालिकाको पदमा हुँदै चुनावी अभियानमा नहिँड्ने बताएको चौधरीले जानकारी दिए । मेयर पद हुँदासम्म म चुनावी गतिविधिमा हिँड्दिन, बालेनले भनेका थिए, ४ गते राजीनामा दिएपछि निस्किन्छु ।कैलालीको थारु बस्तीबाट चुनावी अभियान सुरु गर्ने बालेनले बताएका छन् ।

झापाका रास्वपा नेताहरुसँग छलफल
काठमाडौं महानगरपालिकाका मेयर बालेन्द्र साहले झापाका रास्वपा नेताहरूसँग छलफल गरेका छन् । ललितपुरको ज्वागलस्थित कुमार बेनको घरमा सामूहिक छलफल भएको हो । बालेनले झापा ५ बाट निर्वाचन लड्ने तयारी गरेको चर्चा चल्दै आएको छ । सोही सन्दर्भमा छलफल भएको रास्वपा झापाका सचिव शम्भु सुस्केराले बताए । सुस्केराका अनुसार बालेन साहले झापा ५ को वस्तुस्थितिका बारेमा सोधखोज गरेका थिए । झापा ५ एमाले अध्यक्ष केपी शर्मा ओलीको निर्वाचन क्षेत्र हो । यहाँबाट चुनाव लड्ने इच्छा बालेनले स्थानीय नेताहरूसँग व्यक्त गरेका छन् । भेटमा जिल्ला झापा जिल्ला सभापति प्रकाश पाठकसहित सचिव सुस्केरा, झापा ३ का क्षेत्रीय सभापति लक्ष्मण बस्नेत, झापा ५ का विभागीय सदस्य विरोध सुवेदी र जिल्ला अनुशासन आयोगका संयोजक अर्जुन उप्रेती सहभागी थिए । यसैबीच बालेनको कोर टीममा रहेका रोहन कार्कीले बालेन झापा ५ बाट उठ्ने संकेत गरेका छन् । रास्वपा केन्द्रीय सदस्य समेत रहेका उनले केहीबेरअघि फेसबुकमा लेखेका छन्, ‘यसपाल झापा ५ । हामी आउँनेछौँ प्रमको उम्मेदवार लिएर तयार रहनुस् है ।