एजेन्सी । केटाहरुले युवतीलाई शारीरिक आवश्यकता पूरा गरेपछि छाड्ने रोग सबैतिर छ । त्यतिमात्रै होइन आफ्नो प्यास मेटेपछि हत्या गर्ने सम्मको अपराध पनि हुने गरेको छ । आफूले मन पराएका युवकले साथी मात्र रहन चाहन्छु भनेपछि रिसाएकी युवतीले सामाजिक संजालमा यस्तो कुरा पोस्ट गरिन् कि उनलाई अदालतले जेल सजाय सुनाएको छ ।
यी युवतीलाई ३ महिनाको जेल सजाय सुनाइएको छ । बेलायतको नर्थ योर्कशायरकी यास्मिक वाकर नामकी यी युवतीले ती युवकको आपत्तिजनक फोटो सामाजिक संजालमा पोस्ट गरिदिएकी थिइन् जसले उनीसँग साथी मात्र रहन चाहेको बताएका थिए । डेलीमेलका अनुसार अदालतले ती युवतीले बदला लिन यी फोटो पोस्ट गरेको ठहर गरेको छ । यास्मिनले यी युवकसँग शारीरिक सम्बन्ध पनि राखेकी थिइन् ।
योर्क क्राउन कोर्टमा यास्मिनले बताएअनुसार शारीरिक सम्बन्धपछि युवकले साथी मात्र बनेर रहने भनोपछि उनले यी तस्वीर पोस्ट गरेकी थिइन् । ३० वर्षकी यास्मिनको सामाजिक संजालमा १३ हजार फलोअर छन् । कानुनी कारणले पीडित युवकको पहिचान खुलाइएको छैन । पीडित युवकका अनुसार उनलाई यो पोस्टको स्क्रिनसट पठाइँदा उनी सिनेमा हलमा थिए । आफ्नो नग्न फोटो देखेपछि उनले फोटो हटाइदिन आग्रह गर्दै पुलिसमा उजुरी गर्ने पनि बताएका थिए ।
पीडितका वकिलका अनुसार यो फोटो अनलाइनमा ११ मिनेटसम्म रहेको थियो । यास्मिनले भने अघिल्लो सम्बन्धको क्रममा एक झगडामा उनले आफ्नो एक आँखाको ज्योति गुमाएकोले अहिले आँखाले राम्रोसँग नदेख्दा झुक्किएर तस्वीर पोस्ट गरेको दावी गरेकी थिइन् । यास्मिनले आँखाको दृष्टि राम्रो नभएको दावी गरे पनि यो कारणले गल्ती भएको भन्ने कुरालाई अदालतले अस्वीकार गरेको छ । अदालतले यसलाई रिभेन्ज पोर्नोग्राफी अन्तर्गतको अपराध ठहर गरेको छ ।
