टोकियो । नेपाली श्रमिकहरुको बाक्लो उपस्थिति रहेको मुलुक जापानमा कोरोना भाइरसबाट संक्रमितको संख्या एक हजार भन्दा बढी पुगेको छ । फागुन २१ गते बुधबार बिहान ७ बजे सम्ममा जापानभर संक्रमितहरूको संख्या १ हजार पुग्दा मृत्यु हुनेको संख्या १२ रहेको जापानको स्वास्थ्य मन्त्रालयका अधिकारीहरुले पुष्टि गरेका छन् । यसैगरी हाल ५७ जना संक्रमितहरुको अवस्था चिन्ताजनक रहेको र उनीहरूको उपचार भइरहेको अधिकारीहरुलाई उद्धृत गर्दै जापानी समाचार संस्था एनएचके टेलिभिजनले समाचार प्रशारण गरेको छ ।
हालसम्म संक्रमित मध्य ४३ जना स्वास्थ्यलाभ गरेर अस्पातलबाट डिस्चार्ज भएको बताइएको छ ।
जापानको होक्काइदो क्षेत्र कोरोना भाईरसको संक्रमणबाट सबैभन्दा बढी प्रभावित हुँदा त्यहाँका ७९ जना व्यक्तिमा संक्रमण पाइएको छ । होक्काइदोपछि आइची र राजधानी टोकियो कोरोना भाईरसको चपेटामा परेको पाइन्छ । टोक्यो संगै कानागावा क्षेत्रमा पनि कोरोना भाइरसको संक्रमण बढी पाइएको छ ।
आइची प्रिफेक्चरमा ४१ जना संक्रमित पुष्टी हुँदा टोकियोमा ४० जना कोरोना भाईरसबाट संक्रमित पुगिसकेका छन् ।
यसैगरी कानागावामा ३१ जनामा कोरोना भाईरसको संक्रमण पुष्टि भएको जापानी अधिकारिहरुले जनाएका छन् ।