काठमाडौं । वाङ्मय शताब्दी पुरुष सत्यमोहन जोशी एवं नेपाल विद्युत प्राधिकरणका कार्यकारी निर्देशक कुलमान घिसिङले डा. नम्रता पाण्डे र डा. प्रद्युम्नराज पाण्डेका दुई कृति रहस्य ः जीवन र प्रेम एवं ऊर्जाको सम्युक्त रुपमा कृति विमोचन गर्नुभयो । कार्यक्रममा समालोचक एवं सर्जक डा. राम प्रसाद ज्ञवालीले ऊर्जा कृतिमाथि समिक्षा गर्नुभएको थियो भने डा.लेखप्रसाद निरौलाले रहस्य ः जीवन र प्रेममाथि समिक्षा गर्दै भन्नुभयो– व्यक्तिमा रहेको ऊर्जालाई जागृत गरेर समाजका विभिन्न क्षेत्रमा फैलाउने कोशिस गर्यौं भने सत्कर्मको माध्यमबाट सबैतिर प्रकाशमय बनाउन सकिन्छ । बिभिन्न आयामको माध्यमबाट ऊर्जा बिऊको रूपमा हामीभित्र रहेको छ त्यसलाई वृक्ष बनाउनको लागि फैलन दिनुपर्छ । हाम्रा सत्कर्म र सकारात्मक सोचाई नै ऊर्जालाई प्रवाहमान बनाउने माध्यम हुन् । ऊर्जा विना कुनैपनि सृजनात्मक कार्य सम्भव छैनन् । सृजनात्मक हुनु आफैमा ऊर्जालाई जागृत गराउनु हो र ऊर्जा जागृत भएपछि व्यक्ति सृजनात्मक हुन्छ त्यसैले सृजना (कर्म) र ऊर्जा एकआपसमा सम्बन्धित छन् । बाहिर नदेखिने तर भित्रबाट सृजनात्मक र प्रेमिल बनाईरहने आफूभित्रको ऊर्जाको पहिचान गरी निरन्तर लगनशीलता र इमान्दारीतापूर्वक कर्म गरी सत्यम्, शिवम् र सुन्दरमको भाव जागृत गर्दै जीवनमा सकारात्मक रूपान्तरण ल्याउने सूत्रहरू समेटिएको निबन्धात्मक कृति हो ऊर्जा ।
जीवन वास्तवमै रहस्यमय छ र रहस्य जहिले पनि सानो कुरामा छिपेको हुन्छ । प्रेम त्यो रहस्यलाई उजागर गर्ने एउटा शसक्त माध्यम हो । हामीले जतिनै परिश्रम गरेर, अनेक तिकडम लगाएर भौतिक सुविधा र सम्पन्न भएको ठाने पनि उसको कृपा विना श्वासप्रश्वास पनि चल्दैन । बाहिरी शिक्षा, योग्यता, पद, अनुसन्धान, विज्ञान आदिको विकास गरी पृथ्वीबाट चन्द्रमा नै पुगेर वस्ती बसाउने खुबी राखेको भए पनि त्यसभित्र अस्तित्वको अदृष्य ऊर्जाको रहस्य लुकेको छ । तर, जीवनमा केहि पाउनकै लागि जीवनभरको प्रयासमा जीवन नै जिउन बिर्सने हामीहरुलाई यो रहस्यको ज्ञात नहुन सक्दछ । किनकी ठूला ठूला परिणाम हात पारेर रेकर्ड तोड्न लागि परेका हामीहरुलाई अस्तित्वले अटुट रुपमा, निशुल्क उपलब्ध गराएको अक्सिजनको कारण यो घडीमा जीवित छौँ र यो नै जीवन हो भन्ने ख्याल नहुन सक्छ । जुन दिन अस्पतालको सैय्यामा नाकमा अक्सिजनको पाइप जोडेर सिलिण्डरको सहायताले स्वाश लिनुपर्ने अवस्था आउँछ त्यतिबेला थाहा हुन्छ प्रकृतिले बिना मागे उपलब्ध गराएको उपहार । अहिले हामीलाई यी सब कुराको ख्याल छैन किनकी हामी कसरी सुविधा सम्पन्न, इज्जतपूर्ण र अरुको अगाडि सभ्य र भव्य जीवन देखाउन सकिन्छ भन्दै प्रयासरत छौँ । हामीले हाँसिल गरेका उपलब्धि महान र प्रकृति प्रद्दत सारा चिजहरु सामान्य लाग्ने दिनसम्म उसको रहस्यमय ऊर्जाको अनुभूति वोध हुन सक्दैन । के हुन् ती रहस्यमय सूत्रहरु जसलाई जीवनमा सहज तरिकाले अपनाउँदा जीवन प्रेमपूर्ण र आनन्दित रुपमा जिउन सकिन्छ भन्ने कुराहरुलाई रहस्य ः जीवन र प्रेम कृतिभित्र समेटिएका छन् ।