काठमाडौं । दिनदिनै आफ्नै रेकर्ड ब्रेक गर्दै सुन आकासिनेक्रम जारी छ । नेपाली बजारमा यो साता सुनको मुल्यले एक पछि अर्को गरी नयाँ रेकर्ड राख्यो । बुधबार सुन तोलाकै एक लाख ४९ हजार ५०० रूपैयाँ पुगेर ऐतिहासिक उचाइमा पुग्यो । यो मूल्य हालसम्मकै महंगो हो । यस साताको चार दिन सुनको मूल्य निरन्तर बढेको थियो । यो साता सुनको मूल्य बढोत्तरी भएको छ । नेपाल सुनचाँदी व्यवसायी महासंघका अनुसार यो मुल्य साताको पहिलो दिनको तुलनामा प्रतितोला ८०० रुपैयाँ बढी हो । साताको पहिलो दिन, आइतबार प्रतितोला एक लाख ४६ हजार ७०० रूपैयाँ रहेको मुल्य सोमबार एक लाख ४६ हजार ९०० रूपैयाँ पुग्यो । यसैगरी, सुनको भाउले साताको तेस्रो र चौथो दिन क्रमशः नयाँ रेकर्ड बनाएको थियो । मंगलबार सुन प्रतितोला एक लाख ४७ हजार ८०० रूपैयाँमा र बुधबार प्रतितोला एक लाख ४९ हजार ८०० रूपैयाँ पुग्यो । बुधबारसम्ममा सुन तोलामा तीन हजार १०० रूपैयाँले महंगिसकेको थियो । तर त्यस पश्चात बिहीबार, सुनको मुल्य सामान्य घटेर प्रतितोला एक लाख ४९ हजार ५०० रूपैयाँमा कारोबार भएको थियो । जुन साताको पछिल्लो कारोबार भएको दिन, शुक्रबार तोलामै २ हजार रूपैयाँले गिरावट हुँदा एक लाख ४७ हजार ५०० रुपैयाँमा झर्यो ।यसैगरी, यो साता नेपाली बजारमा चाँदीको मुल्य भने सामान्य घटेको छ । साताको पहिलो दिन आइतबार प्रतितोला एक हजार ८७५ रुपैयाँ रहेको थियो । चाँदीको मूल्य बुधबारसम्ममा प्रतितोला एक हजार ८९५ रूपैयाँको उचाइमा पुगेको थियो । साताको पछिल्लो कारोबार भएको दिन शुक्रबार प्रतितोला एक हजार ८३० रुपैयाँ कायम भयो। यसरी, यस साता चाँदीको मूल्य तोलामा ४५ रूपैयाँले सस्तिएको हो । यस साता विश्व बजारमा पनि सुनको मुल्य बढ्दो क्रममा रहेको छ । जसको प्रभाव नेपाली सुन बजारमा परेको हो । ब्याजदर कटौती गर्ने अमेरिकी रिजर्भ बैंक (फेड) को संकेतका कारण सुनको भाउमा वृद्धि देखिएको हो । यससँगै, राष्ट्रपति पदका उम्मेदवार डोनाल्ड ट्रम्पको कम दर र ट्यारिफको सम्भावनाले सुनको खरिद बढेको छ । जसकारण मुल्य बृद्धिमा चाप परेको बिश्लेषकहरुको भनाइ छ। विश्व बजारमा शुक्रबार सुन प्रति अउन्स २ हजार ४१२ डलर बराबरमा कारोबार भयो ।