काठमाडौं । चालु आर्थिक वर्षको तेस्रो त्रैमासमा नेको इन्स्योरेन्सको खुद नाफा १ करोड ५ लाख रुपैयाँले घटेर २४ करोड १० लाख रुपैयाँमा सीमित भएको हो । गत आर्थिक वर्षको यसै अवधिसम्ममा कम्पनीले २५ करोड १५ लाख रुपैयाँ नाफा कमाएको थियो । यस अवधिमा इन्स्योरेन्सको खुद बीमाशुल्क भने ७ करोड १८ लाख रुपैयाँले बढेर ९२ करोड ८८ लाख रुपैयाँ पुगेको छ । गत आर्थिक वर्षको तेस्रो त्रैमाससम्ममा इन्स्योरेन्सले ८५ करोड ७० लाख रुपैयाँ खुद बीमाशुल्क आर्जन गरेको थियो ।
यस्तै, इन्स्योरेन्सले पुनर्बीमा कमिशनबाट १८ करोड ७ लाख, लगानी कर्जा तथा अन्यबाट ६ करोड ८४ लाख रुपैयाँ आम्दानी गरेको छ । चुक्ता पूँजी एक अर्ब ३१ करोड ७४ लाख रुपैयाँ रहेको कम्पनीको जगेडा कोषमा ४३ करोड १० लाख, बीमा कोषमा ७२ करोड ७९ लाख र महाविपत्ती कोषमा ६ करोड ८९ लाख रुपैयाँ सञ्चित छ ।
कम्पनीको वार्षिक प्रतिशेयर आम्दानी २४ रुपैयाँ ४० पैसा, प्रतिशेयर नेटवर्थ १९३ रुपैयाँ २१ पैसा र मूल्य आम्दानी अनुपात १९.८८ गुणा रहेको छ । यस अवधिसम्ममा कम्पनीले २ लाख १ हजार ५३४ वटा बीमालेख जारी गरी एक अर्ब ६२ करोड २३ लाख रुपैयाँ कुल बीमाशुल्क संकलन गरेको छ ।
यस्तै, कम्पनीले ३ हजार ९६१ वटा दाबी बापत ५८ करोड ६२ लाख रुपैयाँ भुक्तानी गरेको छ भने १ हजार ७३३ वटा दाबी बापत ४८ करोड ९५ लाख रुपैयाँ भुक्तानी गर्न बाँकी छ ।